Chandrababu: ఆంధ్రప్రదేశ్లో కూటమి ప్రభుత్వం తమ మేనిఫెస్టోలో భాగంగా ఇచ్చిన ‘సూపర్ సిక్స్’ హామీల అమలులో మరో ముందడుగు వేస్తోంది. దీపావళి కానుకగా ఉచిత గ్యాస్ సిలిండర్ పథకాన్ని ప్రారంభించేందుకు సిద్ధమైంది. ముఖ్యమంత్రి చంద్రబాబు నాయుడు అధికారికంగా ప్రకటించిన ఈ పథకం ప్రకారం, ప్రతి కుటుంబానికి ఏడాదిలో మూడు సిలిండర్లను ఉచితంగా అందించనున్నారు. ఈ పథకం ద్వారా ప్రభుత్వంపై ఏటా సుమారు 2,684 కోట్ల రూపాయల భారమవుతుందని అంచనా.
Chandrababu Naidu Announces Free LPG Cylinder Program
మహిళా సంక్షేమం పట్ల తమ ప్రభుత్వం గట్టి కట్టుబాటు కలిగి ఉందని, అందుకు సంకేతంగా ఉచిత గ్యాస్ సిలిండర్ పథకాన్ని తీసుకువస్తున్నామని సీఎం చంద్రబాబు నాయుడు వెల్లడించారు. ఇప్పటివరకు కూటమి ప్రభుత్వం తమ హామీల్లో ఐదు పథకాలను విజయవంతంగా అమలు చేసిందని, ఉచిత గ్యాస్ సిలిండర్ పథకం ఆరో హామీ అని వివరించారు. ఈ నెల 24వ తేదీ నుంచి లబ్ధిదారులు తమ గ్యాస్ సిలిండర్ కోసం బుకింగ్ చేయవచ్చని సీఎం ప్రకటించారు. గ్యాస్ సిలిండర్ తీసుకున్న రెండు రోజుల్లోనే సబ్సిడీ డబ్బును లబ్ధిదారుల బ్యాంకు ఖాతాల్లో జమ చేయనున్నట్లు తెలిపారు.
Also Read: Jeevan Reddy: కాంగ్రెస్ పార్టీ కో దండం రా బాబు.. ప్రైవేట్ కంపెనీ పెట్టుకుంటా ?
ఉమ్మడి ఆంధ్రప్రదేశ్లో దీపం పథకం ద్వారా మహిళలకు మద్దతు ఇచ్చిన ఘనత తమదేనని గుర్తుచేసుకున్న చంద్రబాబు, ఉచిత గ్యాస్ సిలిండర్ పథకం ద్వారా మహిళలకు ఆర్థికంగా ఎంతో చేయూత అందిస్తామని తెలిపారు. ఈ పథకంతో మహిళలు వంటకు కావాల్సిన సిలిండర్ కోసం ఖర్చు చేసే డబ్బును ఇతర అవసరాలకు ఉపయోగించుకోవచ్చని ఆయన అభిప్రాయపడ్డారు. ప్రతి సిలిండర్పై ప్రభుత్వం రూ. 851 రాయితీని అందిస్తుందని వివరించారు. టీడీపీ విడుదల చేసిన ఈ పథకం పోస్టర్ ఇప్పటికే సోషల్ మీడియాలో వైరల్ అవుతుండగా, ఈ రోజు జరిగే కేబినెట్ సమావేశంలో అధికారిక ప్రకటన వెలువడే అవకాశం ఉంది.
ఈ ఉచిత గ్యాస్ సిలిండర్ పథకం మహిళలకు ఆర్థిక స్వావలంబనను కలిగించడమే కాకుండా, వంటచెరకు వాడకాన్ని తగ్గించడం ద్వారా పర్యావరణ పరిరక్షణకు కూడా తోడ్పడుతుందని ప్రభుత్వం పేర్కొంది. గ్యాస్ వాడకం సులభతరం కావడంతో మహిళలు ఇంటి పనుల నుండి కొంత విముక్తి పొంది, ఇతర ఉత్పాదక కార్యకలాపాల్లో పాల్గొనే అవకాశం ఉంటుందని సీఎం చంద్రబాబు ఆశాభావం వ్యక్తం చేశారు.