Rajinikanth: సూపర్ స్టార్ రజనీకాంత్ నటించిన “వేట్టయన్ – ద హంటర్” సినిమా బాక్సాఫీస్ వద్ద భారీ విజయాన్ని నమోదు చేసుకుంది. టి.జె. జ్ఞానవేల్ దర్శకత్వం వహించిన ఈ చిత్రం, అక్టోబర్ 10న దసరా కానుకగా విడుదలై ప్రేక్షకులను ఆకట్టుకుంటోంది. అయితే, దసరా సెలవులు ముగిసిన నేపథ్యంలో, సామాన్య ప్రేక్షకులు కూడా ఈ సినిమాను ఆస్వాదించేందుకు టికెట్ ధరలను తగ్గించాలని చిత్ర నిర్మాతలు నిర్ణయించారు.
Rajinikanth Vettaiyan Movie Ticket Price Reduction
తెలంగాణలో అక్టోబర్ 18 నుండి “వేట్టయన్” సినిమా టికెట్ ధరలు తగ్గనున్నాయి. మల్టీప్లెక్స్ లలో రూ. 200, సిటీ సింగిల్ స్క్రీన్లలో రూ. 150, డిస్ట్రిక్ట్ సింగిల్ స్క్రీన్లలో రూ. 110కి టిక్కెట్లు అందుబాటులో ఉంటాయి. ఈ తగ్గింపు వల్ల కుటుంబ ప్రేక్షకులు కూడా సినిమాను చూడటానికి థియేటర్లకు వస్తారని, తద్వారా వసూళ్లు మరింత పెరుగుతాయని నిర్మాతలు ఆశిస్తున్నారు.
Also Read: Samantha: సమంత స్టామినా.. బాలీవుడ్ లో ప్రశంశల వర్షం!!
ఈ చిత్రంలో రజనీకాంత్ “వేట్టయన్” అనే పవర్ ఫుల్ పోలీస్ ఆఫీసర్ గా నటించి మెప్పించారు. ఆయనతో పాటు అమితాబ్ బచ్చన్, మంజు వారియర్, ఫహాద్ ఫాజిల్, రానా దగ్గుబాటి వంటి తారాగణం ఈ సినిమాలో కీలక పాత్రలు పోషించారు. అనిరుధ్ అందించిన సంగీతం ఈ సినిమాకు ప్రధాన ఆకర్షణగా నిలిచింది. న్యాయం, అవినీతి, ఎన్ కౌంటర్ హత్యలు వంటి సమకాలీన అంశాలను చిత్రంలో చర్చించారు.
లైకా ప్రొడక్షన్స్ నిర్మించిన ఈ చిత్రాన్ని తెలుగులో దిల్ రాజు మరియు ఏషియన్ సురేష్ ఎంటర్టైన్మెంట్ సంస్థలు విడుదల చేశాయి. ఇప్పటికే ప్రపంచవ్యాప్తంగా ₹240 కోట్లకు పైగా వసూలు చేసిన ఈ చిత్రం, టికెట్ ధరల తగ్గింపుతో తెలంగాణలో మరింత కలెక్షన్లు రాబడుతుందని అంచనా. ఈ సినిమా విజయవంతంగా ప్రదర్శితమవడం రజనీకాంత్ అభిమానులకు పండగ లాంటిది, సూపర్ స్టార్ మరోసారి తన స్టామినా నిరూపించుకున్నారు.