Sandeep Reddy Vanga: ప్రస్తుతం ప్రభాస్ వరుస ప్రాజెక్టులతో బిజీగా ఉన్నారు. “రాజాసాబ్” (మారుతి దర్శకత్వం) మరియు “ఫౌజీ” (హను రాఘవపూడి దర్శకత్వం) సినిమాలు షూటింగ్ దశలో ఉండగా, వాటి తర్వాత ఆయన సందీప్ రెడ్డి వంగా దర్శకత్వంలో “స్పిరిట్” అనే ప్రాజెక్ట్‌లో నటించబోతున్నారు. ఈ సినిమా గురించి గత రెండేళ్లుగా ఇండస్ట్రీలో చర్చ జరుగుతోంది, అయితే ఇప్పటివరకు షూటింగ్ ప్రారంభం కాలేదు. తాజాగా సందీప్ రెడ్డి వంగా “స్పిరిట్” స్క్రిప్ట్ పనులు చివరిదశలో ఉన్నాయని, వచ్చే ఏడాది షూటింగ్ మొదలుపెట్టి, అది సజావుగా జరిగితే 2026లో ప్రేక్షకుల ముందుకు తీసుకురావాలన్న యోచనలో ఉన్నారని తెలిపారు. ఈ భారీ బడ్జెట్ సినిమా గురించి ఇప్పటికే ప్రేక్షకుల్లో అంచనాలు భారీగా పెరిగాయి.
Sandeep Reddy Vanga Spirit Is the Most-Anticipated Prabhas Film
సందీప్ రెడ్డి వంగా గత సినిమాలు “అర్జున్ రెడ్డి” మరియు “యానిమల్” తో ఘనవిజయం సాధించారు. ముఖ్యంగా “యానిమల్” సినిమా వెయ్యి కోట్లకు పైగా వసూలు చేయడంతో, ఆయన పై సినీ ప్రముఖుల చూపు పెట్టింది. “యానిమల్” సినిమాలో రణబీర్ కపూర్, రష్మిక మందన్నా జంటగా నటించగా, బాబీ డియోల్ పవర్‌ఫుల్ విలన్ పాత్రలో ఆకట్టుకున్నారు. బాబీ డియోల్ పాత్ర స్క్రీన్ టైమ్ తక్కువగా ఉన్నా, రణబీర్‌తో జరిగిన యాక్షన్ సీన్స్ సినిమాకు హైలైట్ గా నిలిచింది. దీంతో “స్పిరిట్”లో కూడా ప్రభాస్‌కు ధీటుగా ఒక సాలిడ్ విలన్ పాత్రను చేర్చే అవకాశాలపై ఆసక్తి పెరిగింది.
Also Read: ANR Awards: అక్కినేని నాగేశ్వరరావు చివరి ఆడియో క్లిప్.. కన్నీరు పెట్టించిన చివరి మాటలు!!
సందీప్ వంగా దర్శకత్వ శైలి కాస్త రాజమౌళి తరహాలోనే ఉంటుంది. ఆయన సినిమాల్లో ప్రతినాయక పాత్రకు ప్రత్యేక ప్రాధాన్యం ఇస్తారు. అందువల్ల, “స్పిరిట్”లో కూడా ప్రభాస్‌కు ధీటుగా ఉన్న విలన్ పాత్ర ఉండేలా ప్రయత్నిస్తున్నారని తెలుస్తోంది. బాలీవుడ్ స్టార్ సైఫ్ అలీ ఖాన్‌ను ప్రతినాయక పాత్రకు తీసుకోబోతున్నారంటున్నారు. ఇటీవల “దేవర” సినిమాలో సైఫ్ అలీ ఖాన్ విలన్ పాత్ర అద్భుతంగా ఆకట్టుకోవడంతో ఆయన “స్పిరిట్”లో కూడా ప్రభాస్‌కు విలన్ గా నటిస్తే మరింత ఆకర్షణీయంగా ఉంటుందన్న అభిప్రాయం వ్యక్తమవుతోంది. అయితే, ఈ విషయంలో అధికారిక ప్రకటన కోసం అభిమానులు ఆసక్తిగా ఎదురు చూస్తున్నారు.
ప్రస్తుతం ప్రభాస్ నటిస్తున్న “రాజా సాబ్” హర్రర్ కామెడీగా రూపొందుతోంది, దీనికి సంబంధించిన ఫస్ట్ లుక్ పోస్టర్ ఇప్పటికే ప్రేక్షకులలో అంచనాలు పెంచింది. అలాగే హను రాఘవపూడి దర్శకత్వం వహిస్తున్న “ఫౌజీ” సినిమా కూడా షూటింగ్ దశలో ఉంది, ఈ రెండు సినిమాలు 2025లో విడుదలయ్యే అవకాశాలు ఉన్నాయి. మరోవైపు, “సలార్ 2” షూటింగ్ కూడా ప్రారంభమవడంతో, ప్రభాస్ వర్క్ షెడ్యూల్ మరింత టైట్ అయ్యింది. ఇక “స్పిరిట్”లో బాలీవుడ్ హీరోయిన్ నటించే అవకాశం ఉందని, త్వరలోనే ఈ విషయంలో అధికారిక ప్రకటన వెలువడే అవకాశం ఉందని టాలీవుడ్ వర్గాలు చెబుతున్నాయి.