Chandrababu Naidu : మహిళా భద్రత కోసం శక్తి యాప్ ప్రారంభం.. సోషల్ మీడియా దుర్వినియోగంపై కఠిన చర్యలు!!

Chandrababu Naidu :ఆంధ్రప్రదేశ్ ముఖ్యమంత్రి చంద్రబాబు నాయుడు రాష్ట్రంలో శాంతిభద్రతలకు విఘాతం కలిగిస్తే ఎవరినీ ఉపేక్షించబోమని హెచ్చరించారు. శాసనసభలో ప్రసంగించిన ఆయన, ప్రజల భద్రత కోసం ప్రభుత్వం కట్టుబడి ఉందని స్పష్టం చేశారు.

మహిళా భద్రతను మెరుగుపర్చేందుకు శక్తి యాప్ (Shakti App) ప్రారంభించామని, ఆపదలో ఉన్న మహిళలు ఫిర్యాదు చేస్తే వెంటనే పోలీసులు స్పందిస్తారని తెలిపారు. మహిళలపై దాడులు చేసే వారిపై కఠిన చర్యలు తప్పవని ఆయన హెచ్చరించారు. గత ప్రభుత్వం శాంతిభద్రతల పరిరక్షణలో పూర్తిగా విఫలమైందని విమర్శించారు.

Chandrababu Naidu on State Security

డ్రగ్స్ రవాణా, గంజాయి సాగు నియంత్రణ కోసం ఈగల్ వ్యవస్థ (Eagle System) ప్రవేశపెట్టామని చంద్రబాబు చెప్పారు. గంజాయి సాగును నిర్మూలించి, ఆయా రైతులకు ప్రత్యామ్నాయ ఉపాధి అవకాశాలు కల్పిస్తామని హామీ ఇచ్చారు. డ్రగ్స్ రవాణా అడ్డుకోవడానికి సరిహద్దుల్లో ప్రత్యేక ఏజెన్సీలు ఏర్పాటు చేస్తున్నట్లు తెలిపారు.

సోషల్ మీడియాలో అసభ్యకర రాతలు రాసే వారిపై కఠిన చర్యలు తీసుకుంటామని చంద్రబాబు హెచ్చరించారు. గత ప్రభుత్వం రాజకీయ లబ్ధి కోసం మహిళలపై దూషణలకు దిగిందని విమర్శించారు. నేర నియంత్రణ కోసం రాత్రి సమయంలో డ్రోన్ పెట్రోలింగ్ (Drone Patrolling), సీసీటీవీ కెమెరాలు (CCTV Cameras) ఏర్పాటు చేస్తున్నామని, 26 సైబర్ సెక్యూరిటీ స్టేషన్లు (Cyber Security Stations) నెలకొల్పుతున్నామని చంద్రబాబు తెలిపారు.

వివేకా హత్య కేసు (Viveka Murder Case) విషయంలో న్యాయం చేస్తామని ఆయన హామీ ఇచ్చారు. శాంతిభద్రతల పరిరక్షణలో తన ప్రభుత్వం కట్టుబడి ఉందని చంద్రబాబు స్పష్టం చేశారు.