Toothbrush: మీ టూత్ బ్రష్ కడగకపోతే ఏం జరుగుతుందో తెలుసా?
Toothbrush: అన్ని వయస్సుల ప్రజలు రోజూ టూత్ బ్రష్ ఉపయోగిస్తారు. అయితే చాలా మంది దాన్ని శుభ్రంగా ఉంచడం లేదా సరైన విధంగా వాడటం మర్చిపోతుంటారు. ‘ది గార్డియన్’ నివేదిక ప్రకారం, సాధారణ టూత్ బ్రష్‌లో లక్షల సంఖ్యలో బ్యాక్టీరియా, ఫంగస్ పెరుగుతాయి. టూత్ బ్రష్‌ను కడిగిన తర్వాత తడిగా ఉంచితే, అవి మరింత వేగంగా వృద్ధి చెంది ఆరోగ్యానికి హాని కలిగించే ప్రమాదం ఉంది.
Hidden Dangers of Your Toothbrush
మీరు టూత్ బ్రష్‌ను నీటిలో కడిగి హోల్డర్‌లో పెట్టినప్పుడు, తేమ ఏర్పడి బ్యాక్టీరియా పెరుగుతుంది. టూత్ బ్రష్‌ను శుభ్రంగా ఉంచకపోతే, వాటి ద్వారా నోటి ద్వారా శరీరంలోకి సూక్ష్మజీవులు వెళ్లే ప్రమాదం ఉంటుంది. దీని వల్ల పంటి సమస్యలు మాత్రమే కాకుండా, ఇతర ఆరోగ్య సమస్యలు కూడా తలెత్తే అవకాశం ఉంది.
ఈ సమస్యను నివారించడానికి, ప్రతిరోజూ బ్రష్ పూర్తిగా ఆరిన తర్వాతే హోల్డర్‌లో పెట్టడం మంచిది. అంతేకాదు, వారానికి ఒక్కసారి బ్రష్‌ను డెంచర్ టాబ్లెట్ కలిపిన నీటిలో ముంచి శుభ్రం చేయడం ఉత్తమం. డెంచర్ టాబ్లెట్ మెడికల్ షాపుల్లో లభిస్తుంది. ఇది టూత్ బ్రష్‌పై ఉన్న హానికరమైన సూక్ష్మజీవులను తొలగించేందుకు సహాయపడుతుంది.
అలాగే, టూత్ బ్రష్ హోల్డర్‌ను కూడా వారానికి ఒకసారి శుభ్రం చేసి, పూర్తిగా ఆరిన తర్వాతే బ్రష్ ఉంచాలి. ఈ చిన్న మార్పులు పాటించడం ద్వారా, మీరు టూత్ బ్రష్ ద్వారా వ్యాధుల బారిన పడకుండా ఉండగలరు. ఆరోగ్యకరమైన దంత సంరక్షణ కోసం ఈ జాగ్రత్తలు తప్పనిసరి.