మరో వివాదంలో పుష్ప 2.. 550 కోట్ల వసూళ్లు తక్కువ చూపించారా?
అల్లు అర్జున్ నటించిన ‘పుష్ప 2’ బాక్సాఫీస్ వసూళ్ల గురించి సంచలన వార్త సోషల్ మీడియాలో వైరల్ అవుతోంది. ఈ చిత్ర నిర్మాతలు అసలు వసూళ్లను తక్కువగా చూపించి, దాదాపు ₹550 కోట్లు ఆదాయపు పన్ను ఎగవేసేందుకు ప్రయత్నించారని ఆరోపణలు వస్తున్నాయి. ఐటీ శాఖ తన తనిఖీల్లో అసలు వసూళ్లను గుర్తించిందని, ఆర్థిక తేడాలు బయటపడ్డాయని కొన్ని నివేదికలు చెబుతున్నాయి.
ఇప్పటికే ‘పుష్ప 2’ దాదాపు ₹1850 కోట్లను వసూలు చేసిందని లెక్కలు చెబుతున్నాయి. అయితే, ఆరోపణల ప్రకారం, అసలు మొత్తం ₹2400 కోట్ల వరకు ఉండొచ్చని అంచనా. ఇది నిజమైతే, భారతీయ సినిమాల బాక్సాఫీస్ చరిత్రలోనే అతిపెద్ద రికార్డు అవుతుంది. ఇప్పటి వరకు ‘దంగల్’ రూ.2000 కోట్లు (చైనా మార్కెట్ సహాయంతో), ‘బాహుబలి 2’ రూ.1900 కోట్లను వసూలు చేశాయి. ఈ నేపథ్యంలో ‘పుష్ప 2’ వసూళ్లు నిజంగా ₹2400 కోట్లను దాటితే, ఇండియన్ సినిమా స్థాయిని మళ్లీ పెంచిన చిత్రంగా నిలుస్తుంది.
టికెటింగ్ పోర్టల్ ‘బుక్ మై షో’ నివేదికల ప్రకారం, ‘పుష్ప 2’కు ఇప్పటి వరకు 15 మిలియన్ టిక్కెట్లు అమ్ముడయ్యాయి. కేవలం ఆన్‌లైన్ టికెట్ విక్రయాల ద్వారానే ఈ సినిమా ₹450 కోట్లు రాబట్టినట్లు అంచనా. అంతేకాక, ఓవర్సీస్ మార్కెట్‌లో ఈ చిత్రం ₹275 కోట్లు వసూలు చేసి, న్యూజిలాండ్, ఆస్ట్రేలియా వంటి దేశాల్లో కొత్త రికార్డులు నెలకొల్పింది.
అభిమానులు ‘పుష్ప 2’ కలెక్షన్లను లెక్కలతో సమర్థించగా, కొందరు నెటిజన్లు ఈ తక్కువగా నివేదించబడిన వసూళ్లపై అనుమానాలు వ్యక్తం చేస్తున్నారు. నిర్మాతలు ఉద్దేశపూర్వకంగానే వాస్తవ లెక్కలను దాచిపెట్టారా? బాక్సాఫీస్ పారదర్శకతపై ఈ వివాదం చర్చనీయాంశమైంది. అయితే, ఈ ఆరోపణలపై చిత్ర బృందం ఇంకా స్పష్టత ఇవ్వలేదు, దీంతో సత్యాసత్యాలు తెలియాల్సి ఉంది.