Rekha Gupta: ఢిల్లీ ముఖ్యమంత్రిగా రేఖా గుప్తా ప్రమాణం.. మహిళా సాధికారతపై దృష్టి!!

Rekha Gupta: భారతీయ జనతా పార్టీ (బీజేపీ) నాయకురాలు రేఖా గుప్తా గురువారం మధ్యాహ్నం ఢిల్లీ ముఖ్యమంత్రిగా ప్రమాణ స్వీకారం చేశారు. రామ్ లీలా మైదానంలో జరిగిన ఈ కార్యక్రమంలో ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, బీజేపీ జాతీయ అధ్యక్షుడు జేపీ నడ్డా, ఎన్డీఏ పాలిత రాష్ట్రాల ముఖ్యమంత్రులు, ఉప ముఖ్యమంత్రులు పాల్గొన్నారు. లెఫ్టినెంట్ గవర్నర్ వీకే సక్సేనా సమక్షంలో రేఖా గుప్తా ముఖ్యమంత్రిగా బాధ్యతలు స్వీకరించారు.

Rekha Gupta assumes Delhi Chief Ministership

రేఖా గుప్తాతో పాటు ఆరుగురు మంత్రులు కూడా ప్రమాణ స్వీకారం చేశారు. వీరిలో పర్వేశ్ సాహిబ్ సింగ్ వర్మ, పంకజ్ కుమార్ సింగ్, ఆశిష్ సూద్, మంజిందర్ సింగ్ సిర్సా, రవీందర్ ఇంద్రజ్ సింగ్, కపిల్ మిశ్రా ఉన్నారు. ఈ కేబినెట్‌లో సామాజిక సమతుల్యతకు ప్రాధాన్యత ఇవ్వబడింది, పూర్వాంచల్, జాట్, సిక్కు, దళిత సామాజిక వర్గాలకు చెందిన ఎమ్మెల్యేలకు చోటు కల్పించారు.

రేఖా గుప్తా తొలిసారి ఎమ్మెల్యేగా ఎన్నికై, వెంటనే ముఖ్యమంత్రి పదవిని స్వీకరించడం విశేషం. షాలీమార్ బాగ్ నియోజకవర్గం నుంచి ఆమె విజయం సాధించారు. గతంలో రెండు సార్లు ఆప్ అభ్యర్థి చేతిలో ఓడిపోయిన ఆమె, ఈసారి అదే అభ్యర్థిని ఓడించి ముఖ్యమంత్రి స్థాయికి ఎదిగారు. మహిళా సాధికారతకు ప్రాధాన్యత ఇస్తూ, రేఖా గుప్తా నాలుగో మహిళా ముఖ్యమంత్రిగా ఢిల్లీలో చరిత్ర సృష్టించారు.

ప్రమాణ స్వీకారానికి ముందు, రేఖా గుప్తా మహిళా సంక్షేమానికి సంబంధించిన పథకాలను ప్రకటించారు. మహిళా సమృద్ధి యోజన తొలి విడతలో భాగంగా, మార్చి 8 నాటికి మహిళల బ్యాంక్ ఖాతాల్లో నెలకు రూ.2,500 జమ చేయనున్నట్లు తెలిపారు. ఈ నిర్ణయం ద్వారా మహిళలకు ఆర్థిక సహాయం అందించడమే కాకుండా, బీజేపీ ఎన్నికల హామీలను నెరవేర్చడం జరుగుతోంది.