టాలీవుడ్లో హీరోల రెమ్యూనరేషన్, భారీ బడ్జెట్లపై మరోసారి చర్చ మొదలైంది. నిర్మాత దిల్ రాజు తాజాగా ఇచ్చిన పోడ్కాస్ట్ ఇంటర్వ్యూలో స్టార్ హీరోల ఫీజులు సినిమా ఖర్చును ఎలా పెంచుతున్నాయో బహిరంగంగా చెప్పారు. మార్కెట్ పరిస్థితిని ముందుగానే వివరించి, పరిమితులు అర్థం చేసుకునే నటులతోనే పనిచేస్తానని ఆయన స్పష్టం చేశారు. పెద్ద హీరోల ఇమేజ్ కారణంగా వారు జీతం తగ్గించుకోవడం కష్టమని, అలా చేస్తే వారి ప్రెస్టీజ్పై ప్రభావం పడుతుందనే భావన ఉందని తెలిపారు.
దిల్ రాజు మాట్లాడుతూ, సాధారణంగా రూ.300 కోట్ల బడ్జెట్ ఉన్న చిత్రంలో హీరోకే 35 నుంచి 40 శాతం వరకు వెళ్లే పరిస్థితి ఉందని అన్నారు. ఈ విధానం వల్ల నిర్మాణ వ్యయం పెరగడమే కాకుండా, నిర్మాతపై ఆర్థిక ఒత్తిడి కూడా అధికమవుతుందని ఆయన అభిప్రాయపడ్డారు. అందుకే తాను ప్రతీ సందర్భంలో నేరుగా మార్కెట్ వాస్తవాలను చెప్పి, అంగీకరించే వారితోనే ప్రాజెక్టులు చేస్తానని వెల్లడించారు.
అయితే బాలీవుడ్లో జరుగుతున్న మార్పులను ఆయన ప్రశంసించారు. హిందీ చిత్రసీమలో చాలా మంది తారలు ముందస్తు భారీ జీతాల బదులు లాభాల్లో వాటా తీసుకునే profit-sharing model వైపు వెళ్తున్నారని చెప్పారు. తెలుగులో ఇంకా ఈ పద్ధతి విస్తృతంగా రాలేదని, కానీ భవిష్యత్తులో ఇది పరిశ్రమకు మరింత ఆరోగ్యకరమైన మార్గం కావచ్చని సూచించారు.
అక్షయ్ కుమార్ను ఉదాహరణగా చూపిస్తూ, ఒకప్పుడు భారీగా వసూలు చేసిన స్టార్ కూడా మార్కెట్ మార్పులకు అనుగుణంగా తన విధానాన్ని మార్చుకున్నారని దిల్ రాజు గుర్తుచేశారు. నిర్మాతగా ఇది తనకు సంతోషాన్నిస్తోందని, ఖర్చుల రికవరీ సులభమవుతోందని అన్నారు. ఆయన వ్యాఖ్యలు తెలుగు సినిమా బడ్జెట్ వ్యవస్థపై కొత్త చర్చకు దారితీశాయి.
