రాజస్థాన్లోని ప్రతాప్నగర్లో తల్లిని చంపిన కన్నకూతురు ఉదంతం అందరినీ షాక్కు గురిచేసింది. ప్రభుత్వ ఉద్యోగం మరియు ఆస్తి కోసం ఓ కూతురు తన తల్లిని క్రూరంగా హత్య చేసిన ఈ ఘటన స్థానికంగా పెను సంచలనం సృష్టించింది. పోలీసుల విచారణలో నిందితురాలు ఆయుషి తన నేరాన్ని అంగీకరించింది. ఈ సంఘటనలో మరో ఆరుగురు బంధువులు కూడా అరెస్టయ్యారు.
ప్రతాప్నగర్లోని రవీంద్రనగర్కు చెందిన నీరాజ్ శర్మ (45) ఏడాది క్రితం భర్తను కోల్పోయారు. భర్త మరణం తర్వాత ప్రభుత్వం నుంచి కారుణ్య నియామకం ద్వారా ఆమెకు కోర్టులో LDC ఉద్యోగం వచ్చింది. కానీ ఆ ఉద్యోగం తనకు కావాలని కుమార్తె ఆయుషి తల్లితో గొడవపడింది. తల్లి ఒప్పుకోకపోవడంతో ఆయుషి మరింత ఆగ్రహం చెందింది. ఉద్యోగంతో పాటు ఆస్తి కూడా తన పేరు మీద రాసుకోవాలని ఆమె పథకం వేసింది.
ఇందులో భాగంగా ఆయుషి తన సమీప బంధువులతో కలిసి తల్లిని చంపడానికి భారీ కుట్ర పన్నింది. ఈ నెల 23న నీరజ్ శర్మ ప్రయాణిస్తున్న కారును ముందస్తు ప్రణాళిక ప్రకారం బంధువుల కారుతో ఢీకొట్టారు. ఈ ప్రమాదంలో నీరజ్ అక్కడికక్కడే మరణించారు. దీన్ని సాధారణ రోడ్డు ప్రమాదంగా చిత్రీకరించేందుకు నిందితులు ప్రయత్నించారు. అయితే మృతురాలి సోదరుడు రాకేశ్ అనుమానం వ్యక్తం చేస్తూ పోలీసులకు ఫిర్యాదు చేశారు.
పోలీసులు కేసు నమోదు చేసి క్షుణ్ణంగా దర్యాప్తు చేపట్టారు. ఆయుషి ప్రవర్తన మరియు కాల్ రికార్డులను పరిశీలించగా అసలు విషయం బయటపడింది. ఆస్తి, ఉద్యోగ వ్యామోహంతోనే కుమార్తె తన తల్లిని బంధువులతో కలిసి హత్య చేసినట్లు గుర్తించారు. ఈ ఘటనలో ప్రధాన సూత్రధారి ఆయుషితో పాటు ఆరుగురు బంధువులను పోలీసులు అరెస్టు చేశారు. మరొక నిందితుడు పరారీలో ఉన్నట్లు డీసీపీ రంజిత్ శర్మ తెలిపారు. తల్లిని చంపిన కన్నకూతురు దుర్బుద్ధిని చూసి స్థానికులు దిగ్భ్రాంతి వ్యక్తం చేస్తున్నారు.
