KBR Park: హైదరాబాద్ కేబీఆర్ పార్క్ ప్రాజెక్టులో బిగ్ చేంజ్.. రెండు స్టీల్ ఫ్లైఓవర్లకు ప్రభుత్వ గ్రీన్ సిగ్నల్..

హైదరాబాద్‌లోని కేబీఆర్ పార్క్ ప్రాజెక్టులో తెలంగాణ ప్రభుత్వం భారీ మార్పులు చేపట్టింది. ఈ మేరకు మున్సిపల్ పరిపాలన, పట్టణాభివృద్ధి శాఖ మంగళవారం జీవో 927ను జారీ చేసింది. కేబీఆర్ పార్క్ చుట్టూ ట్రాఫిక్ చిక్కులను వదిలించేందుకు ఉద్దేశించిన ఫ్లైఓవర్లు, అండర్‌పాస్‌ల ప్రాజెక్టులో భాగంగా గతంలో ప్రతిపాదించిన పలు అండర్‌పాస్‌లు, గ్రేడ్ సెపరేటర్ల స్థానంలో పర్యావరణానికి ఇబ్బంది కలగకుండా రెండు అధునాతన స్టీల్ ఫ్లైఓవర్లను నిర్మించాలని సర్కారు నిర్ణయించింది. ఈ నిర్ణయం ద్వారా నగరంలోని ప్రధాన ప్రాంతాలైన జూబ్లీహిల్స్ మరియు బంజారాహిల్స్ పరిసరాలలో రవాణా వ్యవస్థను మెరుగుపరచాలని అధికార వర్గాలు భావిస్తున్నాయి.

KBR Park steel flyover sanctioned

సవరించిన ప్రతిపాదనల ప్రకారం, జూబ్లీహిల్స్ చెక్‌పోస్ట్ జంక్షన్ నుంచి ముగ్ధ జంక్షన్ వరకు ప్యాకేజీ-1 కింద మొదటి స్టీల్ ఫ్లైఓవర్ మరియు ముగ్ధ జంక్షన్ నుంచి ముఫకమ్‌జా కాలేజ్ మీదుగా బంజారాహిల్స్ రోడ్ నంబర్ 1కి అనుసంధాన ర్యాంప్‌తో ప్యాకేజీ-2 కింద రెండో స్టీల్ ఫ్లైఓవర్ నిర్మాణానికి ప్రభుత్వం ఆమోదముద్ర వేసింది. ఈ బృహత్తర స్టీల్ ఫ్లైఓవర్ల నిర్మాణ పనులను ఈపీసీ కాంట్రాక్టర్‌గా ఉన్న మేఘా ఇంజనీరింగ్ అండ్ ఇన్‌ఫ్రాస్ట్రక్చర్స్ లిమిటెడ్‌కు అప్పగించేందుకు అనుమతి ఇచ్చారు. సవరించిన ఈ ప్రతిపాదనలను ఈపీసీ కమిటీ-3 ముందు ఉంచాలని ఆదేశించిన ప్రభుత్వం, ప్రస్తుత ప్రాజెక్ట్ మేనేజ్‌మెంట్ కన్సల్టెంట్ల సేవలను యథావిధిగా కొనసాగించేందుకు గ్రీన్ సిగ్నల్ ఇచ్చింది.

ఈ ప్రాజెక్టు తదుపరి దశల్లో భాగంగా సవరించిన నిబంధనలకు అనుగుణంగా పనులు ముందుకు సాగనున్నాయి. సంబంధిత కాంట్రాక్ట్ సంస్థలు మరియు అధికార యంత్రాంగం సమన్వయంతో నిర్ణీత కాలపరిమితిలోగా ఈ స్టీల్ ఫ్లైఓవర్ల నిర్మాణం పూర్తి చేయాలని యోచిస్తున్నాయి. నగరంలో పెరుగుతున్న వాహనాల రద్దడిని దృష్టిలో ఉంచుకుని చేపట్టిన ఈ నిర్మాణాలు ట్రాఫిక్ సజావుగా సాగేందుకు దోహదపడతాయని అధికారులు స్పష్టం చేశారు. పర్యావరణ సమతుల్యతను కాపాడుతూనే ఆధునిక రవాణా సౌకర్యాలను కల్పించడమే లక్ష్యంగా ఈ ప్రాజెక్టును ముందుకు తీసుకెళ్తున్నారు.

మరింత అప్‌డేట్స్ కోసం: ఇక్కడ చూడండి