వెంకటేష్ మరియు త్రివిక్రమ్ శ్రీనివాస్ కాంబినేషన్లో వస్తున్న భారీ చిత్రం ‘ఆదర్శ కుటుంబం’ (AK47)పై అంచనాలు ఆకాశాన్నంటుతున్నాయి. వెంకీ 77వ సినిమాగా రూపొందుతున్న ఈ ఫ్యామిలీ ఎంటర్టైనర్ను అక్టోబర్ 2న గాంధీ జయంతి సందర్భంగా ప్రపంచవ్యాప్తంగా గ్రాండ్గా రిలీజ్ చేస్తున్నారు. తాజాగా ఈ సినిమా ప్రమోషన్లో భాగంగా వెంకీ నటించిన ‘చిట్టిబాబు’ పాత్ర గ్లింప్స్ను విడుదల చేశారు.
ak47 family glimpse release
ఈ గ్లింప్స్ ఓ వంటగది సీన్తో మొదలవుతుంది. అందులో శ్రీనిధి శెట్టి వెంకీతో ‘నాన్న, నువ్వు వంట చేసేటప్పుడు హ్యాపీగా ఏసీ వేసుకుని చేసుకోవచ్చు’ అంటూ మాట్లాడుతుంది. దానికి వెంకీ ‘అవును, నేను మ్యాన్ ఆఫ్ ది హౌస్’ అంటూ జవాబిచ్చాడు. అలాగే వాషింగ్ మెషిన్ వల్ల పని తగ్గిందని శ్రీనిధి చెప్పడంతో ఆ దృశ్యాలు నవ్వులు పూయించాయి. రఘుబాబు ‘చిట్టిగారు’ అంటూ పిలిస్తే వెంకీ ‘అస్తమానం తల తిప్పకండి, బుజ్జిగారు మెడ పట్టేస్తుంది’ అంటూ ఫన్నీగా రియాక్ట్ అయ్యాడు.
చిట్టిబాబు పాత్రలో వెంకీ తనదైన స్టయిల్లో ‘నాకు ఎవరేం చేసినా పని నచ్చదు, అందుకే అన్నీ నేనే చూసుకుంటాను’ అంటూ చెప్పడం చాలా క్యూట్గా ఉంది. ఈ గ్లింప్స్లో నారా రోహిత్ కూడా కనిపించి ‘ఆదర్శ కుటుంబం’ అంటూ డైలాగ్ చెప్పడంతో వీడియో ముగిసింది. మొత్తంగా చూస్తే వెంకీ మరియు అతని ఫ్యామిలీ పక్కా ఎంటర్టైన్మెంట్ని అందించబోతున్నారని ఈ గ్లింప్స్ స్పష్టం చేస్తోంది.
ఈ చిత్రంలో KGF ఫేమ్ శ్రీనిధి శెట్టి హీరోయిన్గా నటిస్తుండగా, థమన్ సంగీతం అందించాడు. హారిక అండ్ హాసిని క్రియేషన్స్ బ్యానర్పై సూర్యదేవర రాధాకృష్ణ మరియు వంశీ సంయుక్తంగా ఈ మూవీని నిర్మిస్తున్నారు. వెంకటేష్, త్రివిక్రమ్ కాంబోలో వస్తున్న మొదటి ఫుల్ లెంగ్త్ సినిమా కావడంతో అంచనాలు సహజంగానే భారీగా ఉన్నాయి. అక్టోబర్ 2న విడుదల కానున్న ఈ సినిమా కుటుంబాలకు పండగలా ఉండబోతోంది.
