Amit Shah: అక్టోబర్ 4న తెలంగాణకు అమిత్ షా! బీజేపీ కొత్త వ్యూహం అదేనా?

Amit Shah: కేంద్ర హోంమంత్రి అమిత్ షా అక్టోబర్ 4న తెలంగాణలో పర్యటించనున్నారు. మెదక్ జిల్లా తూప్రాన్ మండలం బ్రాహ్మణపల్లి వద్ద అమూల్ ఆధ్వర్యంలో సబర్ డెయిరీ ఏర్పాటు చేయనున్న పాల ప్లాంట్‌కు ఆయన శంకుస్థాపన చేయనున్నారు. అనంతరం కరీంనగర్‌లో ప్రతిమ వైద్య విజ్ఞాన సంస్థ రజతోత్సవ వేడుకల్లో పాల్గొంటారు. ఈ పర్యటన సందర్భంగా కొత్తగా ఏర్పాటైన రాష్ట్ర బీజేపీ నాయకత్వంతో సమావేశమై, స్థానిక సంస్థల ఎన్నికలు, ఓటర్ల జాబితా ప్రత్యేక సమగ్ర సవరణ అంశాలపై ఆయన దిశానిర్దేశం చేయనున్నట్లు పార్టీ వర్గాలు వెల్లడించాయి. అభివృద్ధి కార్యక్రమాలతో పాటు పార్టీ వ్యవహారాలకూ ప్రాధాన్యం ఇవ్వడంతో ఈ పర్యటన వెనుక ఉన్న రాజకీయ వ్యూహంపై రాష్ట్రంలో విస్తృత చర్చ మొదలైంది.

తెలంగాణపై కమలదళం ప్రత్యేక దృష్టి

తెలంగాణను బీజేపీ జాతీయ నాయకత్వం ‘మిషన్ మోడ్’ రాష్ట్రంగా గుర్తించి, ఇక్కడ పార్టీ విస్తరణపై ప్రత్యేక దృష్టి సారించింది. దక్షిణాదిలో కర్ణాటక స్థాయిలోనే తెలంగాణలోనూ పార్టీ కార్యకలాపాలను ముమ్మరం చేయాలని జాతీయ నాయకత్వం భావిస్తున్నట్లు పార్టీకి చెందిన ఒక సీనియర్ నేత వ్యాఖ్యానించారు. కాంగ్రెస్ నేతృత్వంలోని రాష్ట్ర ప్రభుత్వంపై ప్రజల్లో నెలకొన్న అసంతృప్తిని రాజకీయంగా సద్వినియోగం చేసుకునేందుకు ‘సడక్ సే సదన్ తక్’ విధానాన్ని పార్టీ అనుసరిస్తోంది. వీధి పోరాటాల నుంచి చట్టసభల వరకు ప్రభుత్వాన్ని నిలదీయడమే ఈ విధానం ఉద్దేశం. అమిత్ షా పర్యటనకు సంబంధించిన ముందస్తు ఏర్పాట్లపై చర్చించేందుకు మెదక్ ఎంపీ ఎం. రఘునందన్ రావు ఇప్పటికే పార్టీ రాష్ట్ర నాయకత్వంతో ప్రత్యేకంగా సమావేశమయ్యారు.

పర్యటన షెడ్యూల్ ప్రకారం అమిత్ షా అక్టోబర్ 3 రాత్రి 9.10 గంటలకు బేగంపేట విమానాశ్రయానికి చేరుకుని రాత్రి హైదరాబాద్‌లోనే బస చేస్తారు. మరుసటి రోజు ఉదయం హెలికాప్టర్‌లో తూప్రాన్ చేరుకుని ఉదయం 11.45 నుంచి మధ్యాహ్నం ఒంటి గంట వరకు శంకుస్థాపన కార్యక్రమంలో పాల్గొంటారు. సుమారు ఐదు లక్షల లీటర్ల సామర్థ్యంతో ఏర్పాటయ్యే ఈ ప్లాంట్ స్థానిక పాడి రైతులకు మెరుగైన పాల సేకరణ సౌకర్యాలు కల్పిస్తుందని అంచనా. అక్కడే పాడి రైతులతో నిర్వహించే సభలో కేంద్ర పథకాలపై ఆయన ప్రసంగిస్తారు. మధ్యాహ్నం 2.40 నుంచి 4.10 వరకు కరీంనగర్ కార్యక్రమంలో పాల్గొని, సాయంత్రం 5.15 గంటలకు ప్రత్యేక విమానంలో ఢిల్లీకి తిరుగు పయనమవుతారు.

కేంద్ర హోంమంత్రి పర్యటన నేపథ్యంలో మెదక్ జిల్లా యంత్రాంగం, పోలీసులు భద్రతా ఏర్పాట్లను కట్టుదిట్టం చేశారు. స్థానిక సంస్థల ఎన్నికలు సమీపిస్తున్న తరుణంలో జరుగుతున్న ఈ పర్యటన రాష్ట్ర బీజేపీ కార్యాచరణకు కీలక మలుపుగా మారే అవకాశం ఉంది. కొత్త రాష్ట్ర కమిటీకి ఆయన ఇచ్చే లక్ష్యాలు పార్టీ భవిష్యత్తు ప్రణాళికను నిర్దేశించనున్నాయి. అధికార కాంగ్రెస్, ప్రతిపక్ష భారత రాష్ట్ర సమితిని ఏకకాలంలో ఎదుర్కొనే దిశగా కమలదళం అడుగులు వేస్తున్న తరుణంలో, అమిత్ షా ఇచ్చే రాజకీయ సందేశంపై తెలంగాణ రాజకీయ వర్గాలన్నీ ఆసక్తిగా ఎదురుచూస్తున్నాయి. 2028 అసెంబ్లీ ఎన్నికల లక్ష్యంగా రాష్ట్రంలో పార్టీ బలోపేతానికి ఈ పర్యటన అత్యంత కీలకం కానుందన్న అభిప్రాయం సర్వత్రా వ్యక్తమవుతోంది.

మరింత అప్‌డేట్స్ కోసం: ఇక్కడ చూడండి