తిరుమల తిరుపతి దేవస్థానం (టీటీడీ) ఆధ్వర్యంలోని నీరు, ఆహార విశ్లేషణ ప్రయోగశాలను జాతీయ స్థాయి నమూనాగా తీర్చిదిద్దుతున్నట్లు అదనపు ఈవో సీహెచ్ వెంకయ్య చౌదరి తెలిపారు. బుధవారం ఈ ల్యాబ్‌లో జరిగిన ఆయుధ పూజలో పాల్గొన్న ఆయన, అక్కడి పనితీరును సమీక్షించారు. ఎఫ్ఎస్ఎస్ఏఐ (FSSAI) సహకారంతో అత్యాధునిక సాంకేతిక పరిజ్ఞానంతో ఈ కేంద్రాన్ని అభివృద్ధి చేస్తున్నట్లు పేర్కొన్నారు.
Brahmotsavams Food Testing Lab Standards
శ్రీవారి భక్తులకు అందించే అన్నప్రసాదాలు, లడ్డూల తయారీలో నాణ్యత ప్రమాణాలను నిరంతరం పర్యవేక్షిస్తున్నట్లు వివరించారు. ముడి పదార్థాల సేకరణ దశ నుంచి తుది ప్రసాదాల తయారీ వరకు ప్రతి దశలోనూ నమూనాలను సేకరించి పరీక్షిస్తున్నారు. ప్రస్తుతం ఈ ల్యాబ్‌లో 34 మంది సిబ్బంది విధులు నిర్వహిస్తుండగా, త్వరలోనే మరో ఎనిమిది మందిని నియమించనున్నట్లు వెల్లడించారు.
ఇటీవల జరిగిన బ్రహ్మోత్సవాల సమయంలో సుమారు 2,500 ఆహార నమూనాలను పరీక్షించినట్లు అదనపు ఈవో వెల్లడించారు. ముఖ్యంగా శ్రీవారి లడ్డూ నాణ్యతకు సంబంధించి తేమ, చక్కెర శాతం, జీడిపప్పు పరిమాణం, పోషక విలువలపై 11 రకాల నాణ్యత పరీక్షలు నిర్వహిస్తున్నారు. అలాగే నెయ్యి, ఇతర ఆహార పదార్థాలను క్రమం తప్పకుండా ల్యాబ్‌లో పరీక్షించి ప్రమాణాలను నిర్ధారిస్తున్నారు.
ప్రతిరోజూ భక్తులకు సరఫరా చేసే తాగునీటి నమూనాలను కూడా ఈ ల్యాబ్‌లో పరీక్షిస్తున్నారు. తిరుమలలో ఆహార భద్రత విషయంలో జాతీయ స్థాయి ప్రమాణాలను నెలకొల్పడమే లక్ష్యమని అధికారులు స్పష్టం చేశారు. ఈ కార్యక్రమంలో టీటీడీ హెల్త్ డిప్యూటీ ఈవో సోమన్నారాయణ, ప్రొక్యూర్‌మెంట్ జీఎం ఉమాశంకర్, ల్యాబ్ క్వాలిటీ మేనేజర్ శ్రీ లక్ష్మీనారాయణ తదితరులు పాల్గొన్నారు.
ప్రశాంత్ – పక్కా ఫిల్మీ తెలుగు ఎడిటర్. తెలంగాణ, ఆంధ్రప్రదేశ్ రాజకీయాలు, తెలుగు సినిమా, క్రీడలు, ప్రభుత్వ పథకాలు మరియు ప్రజలకు ఉపయోగపడే వార్తలను సులభమైన తెలుగులో అందిస్తారు. ప్రతి వార్త మా ఎడిటోరియల్ పాలసీ ప్రకారం సమాచారం సరిచూసిన తర్వాతే ప్రచురించబడుతుంది. ఫాలో అవ్వండి — X: https://x.com/pakkafilmy007 | Telegram: https://t.me/pakkafilmytelugu | Instagram: https://instagram.com/pakkafilmy_
