అమెరికా అధ్యక్షుడు డొనాల్డ్ ట్రంప్ మళ్ళీ ఇరాన్ పై భారీ దాడులు మొదలుపెట్టారు. బుధవారం రాత్రి ఇరాన్ పై దాడి చేశామని, ఇంకా పెద్ద ఎత్తున దాడులు చేస్తామని ట్రంప్ ప్రకటించారు. పౌర నివాసాలపై కూడా దాడి చేస్తామని హెచ్చరించారు. తాజా పరిణామాలతో పశ్చిమాసియాలో మళ్ళీ ఉద్రిక్తతలు మొదలయ్యాయి. టర్కీలోని అంకారాలో జరుగుతున్న నాటో సదస్సులో ట్రంప్ మాట్లాడుతూ ఇరాన్ పై దాడుల గురించి వివరించారు.
ట్రంప్ మాట్లాడుతూ గత రాత్రి ఇరాన్ పై దాడి చేశాం. ఈ రోజు రాత్రి మరింత భారీ దాడి చేస్తాం. ఇరాన్ చర్యలు ఆపకపోతే పౌర నిర్మాణాలపై కూడా విరుచుకుపడతాం. ఖర్గ్ ఐలాండ్ ను స్వాధీనం చేసుకుంటాం. హార్ముజ్ జలసంధిని మళ్ళీ దిగ్బంధిస్తాం. ఇరాన్ నౌకల్ని ధ్వంసం చేస్తాం అని ప్రకటించారు. ఇంతకు ముందు కుదిరిన కాల్పుల విరమణను రద్దు చేసుకుంటున్నట్లు ట్రంప్ చెప్పారు. ఇరాన్ నేతలు మోసగాళ్ళు, అబద్ధాలకోరులు అని విమర్శించారు.
ఇప్పటికే అమెరికా సైన్యం 28 ఇరాన్ నౌకల్ని ధ్వంసం చేసిందని ట్రంప్ తెలిపారు. ఈ రోజు ఇంకా నౌకల్ని లక్ష్యంగా చేసుకుంటామని, అవసరమైతే విద్యుత్ మరియు నీటి సౌకర్యాలపై దాడి చేస్తామని హెచ్చరించారు. కొద్ది రోజులుగా శాంతి నెలకొన్న పశ్చిమాసియాలో మళ్ళీ యుద్ధ వాతావరణం ఏర్పడింది. బహ్రెయిన్, కువైట్ లోని అమెరికా 85 బేస్ లపై ఇరాన్ క్షిపణి దాడి చేసింది. దీనికి ప్రతిగా హార్ముజ్ జలసంధి వద్ద ఇరాన్ వైమానిక రక్షణ వ్యవస్థలపై అమెరికా దాడి చేసింది.
అయితే, అమెరికా బెదిరింపులకు తాము భయపడబోమని ఇరాన్ స్పష్టం చేసింది. ఈ ఘర్షణ మరింత తీవ్రంగా మారే ప్రమాదం ఉంది. ఇరాన్ పై భారీ దాడులు జరుగుతుండడంతో అంతర్జాతీయ సమాజం ఆందోళన చెందుతోంది. ట్రంప్ హెచ్చరికలు మరియు సైనిక చర్యలు ఇరాన్ తో సంబంధాలను పూర్తిగా తునాతునకలు చేశాయి. ఇప్పుడు ప్రపంచం మొత్తం ఈ పరిణామాలను ఆసక్తిగా గమనిస్తోంది. ఇరాన్ పై దాడులు ఎక్కడ ఆగుతాయో చెప్పడం కష్టం.
