Epic Review: ఆనంద్ దేవరకొండ వన్ మ్యాన్ షో.. ‘ఎపిక్’ ఎలా ఉందంటే?
టాలీవుడ్లో లవ్స్టోరీస్కు ఎప్పుడూ ప్రత్యేకమైన క్రేజ్ ఉంటుంది. ముఖ్యంగా యూత్కి కనెక్ట్ అయ్యే ప్రేమకథలు, రిలేషన్షిప్స్, కెరీర్ గోల్స్, ఫ్యామిలీ ఎమోషన్స్తో కూడిన సినిమాలకు మంచి ఆదరణ లభిస్తోంది. ఈ నేపథ్యంలో ‘బేబీ’తో సక్సెస్ఫుల్ జోడీగా నిలిచిన ఆనంద్ దేవరకొండ – వైష్ణవి చైతన్య మరోసారి ‘ఎపిక్: ఫస్ట్ సెమిస్టర్’తో ప్రేక్షకుల ముందుకొచ్చారు. లండన్ బ్యాక్డ్రాప్, యూత్ఫుల్ రిలేషన్షిప్, కెరీర్, కుటుంబం, వ్యక్తిగత నిర్ణయాలు వంటి అంశాలతో తెరకెక్కిన ఈ సినిమా ఎలా ఉందో ఈ సమీక్ష లో చూద్దాం.
కథ: వనపర్తికి చెందిన ఆదిత్య (ఆనంద్ దేవరకొండ)కు సినిమా డైరెక్టర్ కావాలనే కల ఉంటుంది. అయితే కొడుకు సినిమాల్లోకి వెళ్లడం కంటే మంచి ఉద్యోగం సంపాదించాలని తండ్రి చంద్రశేఖర్ (శివాజీ) కోరుకుంటాడు. దీంతో ఆదిత్యను పైచదువుల కోసం లండన్ పంపిస్తాడు. లండన్లో ఓ కోర్సు కోసం వెళ్లిన ఆదిత్యకు కడలి (వైష్ణవి చైతన్య) పరిచయం అవుతుంది. పూర్తిగా తన స్వతంత్ర ఆలోచనలతో జీవించే కడలి, జీవితాన్ని ప్రాక్టికల్గా చూస్తుంది. ఇద్దరి మధ్య పరిచయం క్రమంగా దగ్గరవుతుంది. వారి బంధం లివ్-ఇన్ రిలేషన్షిప్ వరకు వెళ్తుంది. అయితే ఈ రిలేషన్కు కడలి పెట్టే కొన్ని షరతులు, ఇద్దరి మధ్య భిన్నమైన ఆలోచనలు, కెరీర్పై ఉన్న ఆశలు, కుటుంబం పట్ల ఉన్న బాధ్యతలు కథలో కీలకంగా మారతాయి. ఈ పది నెలల ప్రయాణంలో వారి బంధం ఎలాంటి మలుపులు తిరిగింది? ఆదిత్య తన డైరెక్టర్ కావాలనే కలను ఎలా ముందుకు తీసుకెళ్లాడు? చివరకు ఈ ఇద్దరి రిలేషన్షిప్ ఎక్కడికి చేరింది? అనేది ‘ఎపిక్: ఫస్ట్ సెమిస్టర్’ కథ.
విశ్లేషణ: ‘ఎపిక్’లో పెద్ద ట్విస్టులు, భారీ కథ కంటే పాత్రల జీవితాలను, వారి ఆలోచనలను, రిలేషన్షిప్లో వచ్చే చిన్న చిన్న సంఘర్షణలను చూపించే ప్రయత్నం కనిపిస్తుంది. ముఖ్యంగా యువత ఎదుర్కొనే కెరీర్ కన్ఫ్యూజన్, ప్రేమలో ఉండే భావోద్వేగాలు, తల్లిదండ్రుల అంచనాలు వంటి అంశాలు కథలో బాగా కలిశాయి. ఫస్టాఫ్లో ఫ్యామిలీ ఎమోషన్స్, లండన్ జర్నీ, హీరో-హీరోయిన్ పరిచయం, వారి మధ్య ఏర్పడే బంధం వంటి అంశాలతో సినిమా ఫ్రెష్గా సాగుతుంది. హీరో క్యారెక్టర్లోని అమాయకత్వం, తన కలను నెరవేర్చుకోవాలనే తపన ప్రేక్షకులకు బాగా కనెక్ట్ అవుతాయి. సెకండాఫ్లో రిలేషన్షిప్తో పాటు కెరీర్, బాధ్యతలు, వ్యక్తిగత నిర్ణయాలపై కథ ఎక్కువగా ఫోకస్ చేస్తుంది. కొన్ని సన్నివేశాలు ఆలోచింపజేసేలా ఉంటాయి. ప్రతి వ్యక్తికి తనదైన ఐడెంటిటీ, తన జీవితంపై తన నిర్ణయం ఎంత ముఖ్యమో చెప్పే సన్నివేశాలు ఆకట్టుకుంటాయి.
నటీనటులు: ఆనంద్ దేవరకొండ – సినిమాకు మెయిన్ హైలైట్.. ‘ఎపిక్’ మొత్తానికి ఆనంద్ దేవరకొండ పెర్ఫార్మెన్స్ అతిపెద్ద బలం అని చెప్పొచ్చు. ఆదిత్య పాత్రలో ఆనంద్ చాలా సహజంగా కనిపించాడు. అమాయకత్వం, ప్రేమలోని కన్ఫ్యూజన్, కుటుంబం పట్ల బాధ్యత, కెరీర్పై ఉన్న భయం, తన కలను సాధించాలనే పట్టుదల.. ఇలా పాత్రలోని ప్రతి ఎమోషన్ను చాలా నేచురల్గా క్యారీ చేశాడు.
ముఖ్యంగా ఎమోషనల్ సన్నివేశాల్లో ఆనంద్ తన నటనతో సినిమాను మరో స్థాయికి తీసుకెళ్లాడు. ఎక్కడా ఓవర్ యాక్షన్కు వెళ్లకుండా చాలా సింపుల్గా, రియలిస్టిక్గా పెర్ఫార్మ్ చేయడం ఆకట్టుకుంటుంది. అతని లుక్స్, బాడీ లాంగ్వేజ్, డైలాగ్ డెలివరీ అన్నీ పాత్రకు సరిగ్గా సరిపోయాయి. ముఖ్యంగా మధ్యతరగతి కుటుంబం నుంచి వచ్చిన యువకుడిగా అతని స్క్రీన్ ప్రెజెన్స్ చాలా నేచురల్గా ఉంది. ‘ఎపిక్’లో ఆనంద్ దేవరకొండకు మరో మంచి పెర్ఫార్మెన్స్ క్రెడిట్గా చేరుతుంది. వైష్ణవి చైతన్య కడలి పాత్రలో మోడ్రన్, ఇండిపెండెంట్ అమ్మాయిగా ఆకట్టుకుంది. తన నిర్ణయాలపై స్పష్టత ఉన్న యువతిగా ఆమె పాత్రను బాగా క్యారీ చేసింది.
ఆనంద్ – వైష్ణవి మధ్య కెమిస్ట్రీ మరోసారి వర్కవుట్ అయింది. ‘బేబీ’ తర్వాత ఈ జంటను మరోసారి తెరపై చూడటం సినిమాకు సహజంగానే మంచి ప్లస్ అయింది. అయితే కొన్ని సందర్భాల్లో కడలి పాత్రలో వచ్చే మార్పులు పూర్తిగా కన్విన్సింగ్గా అనిపించకపోవడం కొంత మైనస్. శివాజీ, వాసుకి హీరో తల్లిదండ్రుల పాత్రల్లో బాగా ఆకట్టుకున్నారు. ముఖ్యంగా ఫ్యామిలీ ఎమోషన్స్ ఉన్న సన్నివేశాల్లో వారి అనుభవం కనిపిస్తుంది. ఫ్రెండ్స్ పాత్రల్లో కనిపించిన నటీనటులు తమ పరిధిలో మెప్పించారు.
టెక్నికల్ విభాగం: సినిమాటోగ్రఫీ ‘ఎపిక్’కు మంచి ప్లస్ పాయింట్. లండన్ బ్యాక్డ్రాప్ను విజువల్గా అందంగా చూపించారు. విజువల్స్ సినిమాకు ఫ్రెష్ ఫీల్ తీసుకొచ్చాయి. హెషామ్ అబ్దుల్ వాహబ్ సంగీతం, బ్యాక్గ్రౌండ్ స్కోర్ సినిమాకు మరో బలం. పాటలు వినడానికి బాగుండటంతో పాటు కీలక సన్నివేశాల్లో నేపథ్య సంగీతం మంచి ఫీల్ను క్రియేట్ చేస్తుంది. ఆదిత్య హాసన్ డైలాగ్స్లో యూత్ఫుల్ టచ్ కనిపిస్తుంది. రిలేషన్షిప్స్, కెరీర్, వ్యక్తిగత స్వేచ్ఛ వంటి విషయాలపై రాసిన కొన్ని సంభాషణలు ఆలోచింపజేస్తాయి.
నిర్మాణ విలువలు కూడా బాగున్నాయి. సితార ఎంటర్టైన్మెంట్స్ స్థాయికి తగ్గ ప్రొడక్షన్ క్వాలిటీ కనిపిస్తుంది. ఎడిటింగ్ మాత్రం ఇంకాస్త క్రిస్ప్గా ఉండాల్సింది. ముఖ్యంగా ఒకే తరహా సన్నివేశాలు కొంచెం ట్రిమ్ చేసి ఉంటే సినిమా మరింత వేగంగా సాగేది.
ప్లస్ పాయింట్స్
ఆనంద్ దేవరకొండ నేచురల్ పెర్ఫార్మెన్స్
ఆనంద్ – వైష్ణవి కెమిస్ట్రీ
ఫ్యామిలీ ఎమోషన్స్
హెషామ్ సంగీతం, బ్యాక్గ్రౌండ్ స్కోర్
మైనస్ పాయింట్స్:
సెకండాఫ్లో కథనం కొంత నెమ్మదించడం
తీర్పు: ‘ఎపిక్: ఫస్ట్ సెమిస్టర్’ ఒక పర్ఫెక్ట్ లవ్స్టోరీ కంటే యువత జీవితంలోని ప్రేమ, కెరీర్, బాధ్యతలు, వ్యక్తిగత నిర్ణయాలను చూపించే ప్రయత్నం చేసిన యూత్ఫుల్ డ్రామా. హీరో అమాయకత్వం, ఎమోషన్స్, కెరీర్ పట్ల ఉన్న తపన ప్రేక్షకులకు బాగా కనెక్ట్ అవుతాయి.
రేటింగ్: 3.5/5
ఫైనల్ వర్డిక్ట్:ఆనంద్ దేవరకొండ వన్ మ్యాన్ షో.. యూత్ఫుల్ ఎమోషన్స్తో కూడిన ‘ఎపిక్’
