Jana Nayagan:కోలీవుడ్ స్టార్ హీరో దళపతి విజయ్ (Thalapathy Vijay) నటిస్తున్న 69వ చిత్రం, ఆయన సినీ కెరీర్‌లోనే చివరి ప్రాజెక్ట్ అయిన ‘జననాయకన్’ (Jana Nayagan) విడుదల తేదీపై గత కొన్ని రోజులుగా ఇంటర్నెట్‌లో విపరీతమైన చర్చ నడుస్తోంది. హెచ్. వినోత్ (H. Vinoth) దర్శకత్వంలో కేవీఎన్ ప్రొడక్షన్స్ నిర్మిస్తున్న ఈ పొలిటికల్ యాక్షన్ థ్రిల్లర్ జూన్ 19న థియేటర్లలోకి రాబోతుందంటూ బుకింగ్ ప్లాట్‌ఫామ్స్ మరియు సోషల్ మీడియాలో వార్తలు వైరల్ అవుతున్నాయి. జూన్ 22న విజయ్ పుట్టినరోజు ఉండటంతో, ఈ బర్త్‌డే వీకెండ్ రిలీజ్ టాక్ అభిమానుల్లో పూనకాలు తెప్పిస్తోంది.

Vijay Jana Nayagan June 19 Release

నిజానికి ఈ చిత్రం అంతకుముందే విడుదల కావాల్సి ఉన్నప్పటికీ, సెన్సార్ బోర్డ్ (CBFC) క్లియరెన్స్ మరియు కొన్ని లీగల్ పరిణామాల కారణంగా వాయిదా పడుతూ వచ్చింది. ఇటీవల తిరుచెందూర్ ఆలయ సందర్శనలో చిత్ర నిర్మాత వెంకట్ కె. నారాయణ మాట్లాడుతూ.. సినిమా సెన్సార్ సర్టిఫికేట్ రాగానే అధికారిక విడుదల తేదీని గ్రాండ్‌గా అనౌన్స్ చేస్తామని, ప్రపంచవ్యాప్తంగా చాలా భారీ స్థాయిలో రిలీజ్ చేయడానికి ప్లాన్ చేస్తున్నామని స్పష్టం చేశారు. ఈ నేపథ్యంలోనే ఇండస్ట్రీ సర్కిల్స్ జూన్ 19 తేదీని దాదాపు ఖరారు చేసినట్లు భావిస్తున్నాయి.

ఒకవేళ ఇదే తేదీ ఫిక్స్ అయితే విజయ్ ఫ్యాన్స్‌కు ఇది డబుల్ సెలబ్రేషన్ (Double celebration) అని చెప్పాలి. ఒకవైపు తమ అభిమాన హీరో లాస్ట్ మూవీ థియేటర్లలో చూడటం, మరోవైపు ఆయన బర్త్‌డే వేడుకలు కలిసి తమిళనాడుతో పాటు ఓవర్సీస్ బాక్సాఫీస్ వద్ద కలెక్షన్ల సునామీ సృష్టించడం ఖాయం. ఇప్పటికే ట్విట్టర్ (X), ఇన్‌స్టాగ్రామ్‌లలో #JanaNayagan హ్యాష్‌ట్యాగ్‌తో ఫ్యాన్ మేడ్ పోస్టర్స్, స్పెషల్ ఎడిట్స్ ఇంటర్నెట్‌ను షేక్ చేస్తున్నాయి.

పూజా హెగ్డే, బాబీ డియోల్, మమితా బైజు కీలక పాత్రల్లో నటిస్తున్న ఈ చిత్రానికి అనిరుధ్ రవిచందర్ (Anirudh Ravichander) మ్యూజిక్ అందిస్తున్నారు. విజయ్ పూర్తిస్థాయి రాజకీయాల్లోకి వెళ్లే ముందు వస్తున్న సినిమా కావడంతో, పొలిటికల్ బ్యాక్‌డ్రాప్‌లో సాగే ఈ కథ ట్రేడ్ వర్గాల్లో సైతం హాట్ టాపిక్‌గా మారింది. అఫీషియల్ అనౌన్స్‌మెంట్ కోసం ఇండస్ట్రీ మొత్తం ఆసక్తిగా ఎదురుచూస్తోంది.