ఫ్రెంచ్ దిగ్గజ దర్శకుడు, ఆస్కార్ అవార్డు గ్రహీత కోస్టా గావ్రాస్ సమక్షంలో ఈ గౌరవాన్ని రాజమౌళికి అందించారు. ఈ కార్యక్రమంలో రాజమౌళి ప్రదర్శించిన పలు చిత్రాలను ప్రత్యేకంగా ప్రదర్శించడం కూడా ప్రధాన ఆకర్షణగా నిలిచింది. ప్రపంచ సినీ చరిత్రలో ఎంతో ప్రతిష్టాత్మకమైన ఈ సంస్థలో చోటు దక్కడం ప్రతి దర్శకుడికీ అరుదైన గౌరవంగా భావిస్తున్నారు.
ఈ గౌరవంపై స్పందించిన రాజమౌళి, పారిస్లో తన సినిమాలను ప్రదర్శించడమే గొప్ప గౌరవమని భావించినట్లు, కానీ హెన్రీ లాంగ్లోయిస్ హాల్లో తన పేరుతో శాశ్వత సీటు ఏర్పాటు చేయడం జీవితంలో ఊహించని సంఘటనగా అభివర్ణించారు. ఈ అనుభూతిని మాటల్లో చెప్పలేనని, ప్రపంచ సినీ చరిత్రలో ఎంతో ప్రాధాన్యత కలిగిన ఈ సంస్థలో తనకు చోటు దక్కడం జీవితాంతం గుర్తుండిపోతుందని ఆయన పేర్కొన్నారు. భారతీయ సినిమాపై ప్రత్యేక గౌరవం చూపిన కోస్టా గావ్రాస్తో పాటు సినీమాథెక్ ఫ్రాన్సైస్ బృందానికి హృదయపూర్వక కృతజ్ఞతలు తెలిపారు.
ప్రస్తుతం రాజమౌళి సూపర్ స్టార్ మహేష్ బాబు హీరోగా రూపొందుతున్న ప్రతిష్టాత్మక అడ్వెంచర్ చిత్రం ‘వారణాసి’ ప్రీ-ప్రొడక్షన్ పనులతో బిజీగా ఉన్నారు. గతంలో ఆయన దర్శకత్వంలో వచ్చిన ‘బాహుబలి’ మరియు ‘ఆర్ఆర్ఆర్’ చిత్రాలు ప్రపంచవ్యాప్తంగా సంచలన విజయాలు సాధించాయి. ముఖ్యంగా ‘ఆర్ఆర్ఆర్’ లోని ‘నాటు నాటు’ పాట ఆస్కార్ అవార్డు గెలుచుకోవడంతో తెలుగు సినిమా ఖ్యాతి అంతర్జాతీయ స్థాయికి చేరుకుంది. ఫ్రాన్స్లో లభించిన ఈ గౌరవం తెలుగు చిత్ర పరిశ్రమకు మరో మైలురాయిగా సినీ వర్గాలు భావిస్తున్నాయి. ఒక భారతీయ ప్రాంతీయ దర్శకుడికి ఇలాంటి అరుదైన గౌరవం రావడం దేశ సినీ చరిత్రలో విశేషంగా నిలిచిపోతుంది. ఈ సందర్భంగా రాజమౌళిని నిజంగా చరిత్ర సృష్టించిన జక్కన్న అని చెప్పడంలో అతిశయోక్తి లేదు.
