ముంబై-అహ్మదాబాద్ బుల్లెట్ రైలు ప్రాజెక్టులో జాప్యానికి భారతీయ మంత్రి మరియు అధికారులే కారణమని జపాన్ మాజీ మంత్రి హిడేకి మకిహారా తీవ్ర ఆరోపణలు చేశారు. ఈ ప్రాజెక్టులో పదేపదే వాగ్దానాలు నిలబెట్టుకోవడంలో విఫలమైన అధికారులు స్వప్రయోజనాల కోసం పనిచేశారని, పూర్తి నిర్లక్ష్యం ప్రదర్శించారని మాజీ న్యాయశాఖ మంత్రి ఆగ్రహం వ్యక్తం చేశారు. జపాన్ వార్తా సంస్థ ప్రచురించిన కథనం తర్వాత మకిహారా ఈ వ్యాఖ్యలు చేయడం విశేషం.
Bullet Train Delay Blame Game
ప్రస్తుతం 2026లో కూడా ఈ ప్రాజెక్టు పూర్తయ్యే జాడ కనిపించడం లేదు. 2027 ఆగస్టు 15న మొదటి సర్వీస్ ప్రారంభమవుతుందని చెప్పినా, పనులు నెమ్మదిగా సాగుతున్నాయి. ఈ పరిస్థితిలో ప్రతిపక్షమైన కాంగ్రెస్ పార్టీ ఈ విషయాన్ని ప్రధాని మోదీపై విమర్శలకు వాడుకుంటోంది. కాంగ్రెస్ నేత పవన్ ఖేరా మకిహారా వ్యాఖ్యలను ఎక్స్ లో షేర్ చేస్తూ, ప్రధానిని ‘రీల్ మంత్రి’ అంటూ ఎద్దేవా చేశారు. భారతదేశం మౌలిక సదుపాయాల భాగస్వామ్యాన్ని అధ్వాన్నంగా నిర్వహించిందని, విదేశీ అధికారులు కూడా ఇప్పుడు అసమర్థతపై మాట్లాడే దుస్థితి వచ్చిందని ఖేరా విమర్శించారు.
ఈ ప్రాజెక్టుకు జపాన్ అంతర్జాతీయ సహకార సంస్థ (JICA) పాక్షికంగా నిధులు సమకూరుస్తోంది. షింకన్సెన్ టెక్నాలజీని ఉపయోగించి నిర్మించే ఈ హైస్పీడ్ రైల్ కారిడార్ భారతదేశపు మొట్టమొదటి ప్రయత్నం. అయితే, భూసేకరణ, నిధుల కేటాయింపు వంటి సమస్యల కారణంగా ప్రాజెక్టు మొదటి నుంచీ జాప్యాలను ఎదుర్కొంటోంది. మకిహారా వ్యాఖ్యల వెనుక జపాన్ తో విభేదాలు లేవని భారత ప్రభుత్వం స్పష్టం చేసింది.
జపాన్ తో విభేదాలు లేవని కేంద్రం శుక్రవారం తెలిపింది. విదేశాంగ శాఖ మాట్లాడుతూ, ద్వైపాక్షిక చర్చలు కొనసాగుతున్నాయని, మకిహారా వ్యాఖ్యలు ఆయన వ్యక్తిగత అభిప్రాయమేనని పేర్కొంది. ఈ ప్రాజెక్టులో భారత్కు ఎలాంటి నిర్లక్ష్యం లేదని, ఆరోపణలు సత్యదూరమని విదేశీ వ్యవహారాల శాఖ నొక్కి చెప్పింది. బుల్లెట్ రైలు ప్రాజెక్టు వేగంగా పూర్తి కావడానికి ప్రయత్నాలు జరుగుతున్నాయని అధికారులు హామీ ఇచ్చారు.
