తెలంగాణ రాష్ట్ర రెవెన్యూ, సమాచార మరియు గృహనిర్మాణ శాఖ మంత్రి పొంగులేటి శ్రీనివాస్ రెడ్డి హైదరాబాద్‌లో రాష్ట్రంలో దశాబ్దాలుగా పెండింగ్‌లో ఉన్న 22-ఎ భూ సమస్యల శాశ్వత పరిష్కారం నిమిత్తం కీలక ప్రకటన చేశారు. రాష్ట్రంలో దశాబ్దాలుగా నలుగుతున్న 22-ఎ భూ సమస్యల పరిష్కారం దిశగా ముఖ్యమంత్రి రేవంత్ రెడ్డి ఇచ్చిన హామీల అమలులో భాగంగా ప్రభుత్వం ఒక నెల రోజుల్లోనే దరఖాస్తులను పరిష్కరించేందుకు శరవేగంగా చర్యలు చేపడుతున్నట్లు ఆయన తెలిపారు. చట్టబద్ధమైన హక్కులున్న ఏ ఒక్క నిజమైన లబ్ధిదారుడికి అన్యాయం జరగకుండా పారదర్శకతతో ఈ ప్రక్రియను ముగించనున్నట్లు మంత్రి పేర్కొన్నారు.
Ponguleti Srinivas addresses land regularization
గత ప్రభుత్వ హయాంలో జీవో 59 అమలు ప్రక్రియలో జరిగిన అక్రమాలు, అక్రమ క్రమబద్ధీకరణలు మళ్లీ పునరావృతం కాకుండా ప్రభుత్వం కట్టుదిట్టమైన చర్యలు చేపట్టిందని మంత్రి వెల్లడించారు. దీనికోసం గతంలో ఇప్పటికే జారీ చేసిన కన్వేయన్స్ డీడ్స్ కేసులను సైతం క్షేత్రస్థాయిలో సమగ్రంగా పరిశీలించాలని రెవెన్యూ అధికారులను ఆదేశించినట్లు ఆయన వివరించారు. ముఖ్యమంత్రి రేవంత్ రెడ్డి హామీ ఇచ్చిన 24 గంటల్లోనే 22-ఎ సమస్యలపై ఉన్నతస్థాయి కమిటీని ఏర్పాటు చేసినట్లు స్పష్టం చేశారు.
ప్రభుత్వం 22-ఎ కింద ఉన్న సుమారు 10 నుంచి 12 రకాల సంక్లిష్ట సమస్యలను ఫాస్ట్‌ట్రాక్ విధానంలో వేగవంతంగా పరిష్కరిస్తున్నట్లు మంత్రి పొంగులేటి శ్రీనివాస్ రెడ్డి తెలిపారు. ఇప్పటికే జివో 118, జివో 76లకు అనుగుణంగా స్పష్టమైన మెమోలను జారీ చేశామని వెల్లడించారు. ప్రధానంగా 22-ఎ జాబితాలో ఉన్నప్పటికీ జీహెచ్‌ఎంసీ, హెచ్‌ఎండీఏ, డీటీసీపీ మరియు సంబంధిత మున్సిపల్ అనుమతులు కలిగిన ఇళ్లు, ప్లాట్లు, ఫ్లాట్ల రిజిస్ట్రేషన్లకు అనుమతులు మంజూరు చేస్తూ ప్రజలకు పెద్ద ఊరట కల్పించినట్లు ఆయన చెప్పారు.
అంతేకాకుండా దశాబ్దాలుగా పెండింగ్‌లో ఉన్న అర్బన్ ల్యాండ్ సీలింగ్ దరఖాస్తుల పరిష్కారానికి మరియు నాలా ప్రక్రియ పూర్తికాని పట్టా భూముల రిజిస్ట్రేషన్ సమస్యలకు త్వరితగతిన ముగింపు పలకనున్నట్లు రెవెన్యూ మంత్రి వివరించారు. జీవో 59 అమలు ప్రక్రియలో ఎలాంటి అక్రమాలకూ తావులేకుండా పూర్తి నిబంధనల ప్రకారమే నిర్ణయాలు తీసుకుంటున్నామని ఆయన స్పష్టం చేశారు. ప్రతి రెవెన్యూ గ్రామంలో సమగ్ర భూ సర్వేను వచ్చే పద్దెనిమిది నెలల్లో పూర్తి చేయాలని అధికారులను ఆదేశించినట్లు తెలిపారు.
మరింత అప్‌డేట్స్ కోసం: ఇక్కడ చూడండి
