Rajagopal Reddy: రాజగోపాల్ రెడ్డి జంప్? 20 మంది ఎమ్మెల్యేలు?
తెలంగాణ కాంగ్రెస్లో అంతర్గత రాజకీయాలు మరోసారి హాట్ టాపిక్గా మారాయి. మొయినాబాద్లోని ఓ ఫార్మ్హౌస్లో కాంగ్రెస్ సీనియర్ నేత రాజగోపాల్ రెడ్డి ఆధ్వర్యంలో దాదాపు 20 మంది ఎమ్మెల్యేలు రహస్యంగా సమావేశమైనట్లు ప్రచారం జరుగుతోంది. ఈ భేటీలో సీఎం రేవంత్ రెడ్డి వ్యవహారశైలి, పార్టీలో కొందరి ఆధిపత్యంపై ఎమ్మెల్యేలు తీవ్ర అసంతృప్తి వ్యక్తం చేసినట్లు సమాచారం. అవసరమైతే ప్రభుత్వం ఇబ్బందుల్లో పడినా తమ వైఖరిని మార్చుకునేది లేదనే స్థాయిలో చర్చ జరిగినట్లు రాజకీయ వర్గాల్లో ఊహాగానాలు వినిపిస్తున్నాయి.
ఈ సమావేశానికి కొందరు సీనియర్ మంత్రుల మద్దతు కూడా ఉన్నట్లు ప్రచారం జరుగుతోంది. ఓ బీసీ మంత్రి, ముఖ్యమంత్రి సొంత జిల్లాకు చెందిన మరో మంత్రి, రంగారెడ్డి, నల్గొండ జిల్లాలకు చెందిన సీనియర్ ఎమ్మెల్యేలు, ఉమ్మడి మహబూబ్నగర్ జిల్లాకు చెందిన పలువురు ఎమ్మెల్యేలు ఇందులో పాల్గొన్నట్లు వార్తలు వస్తున్నాయి. కాంగ్రెస్కు 64 మంది ఎమ్మెల్యేల బలం ఉన్న నేపథ్యంలో 20 మంది అసంతృప్తి నేతలు ఒక్కతాటిపైకి వస్తే రాజకీయంగా ప్రభావం చూపే అవకాశం ఉంటుందని విశ్లేషణలు వినిపిస్తున్నాయి.
ఇదే సమయంలో రేవంత్ రెడ్డి విదేశీ పర్యటనకు సంబంధించిన పరిణామాలు కూడా చర్చనీయాంశంగా మారాయి. అమెరికా పర్యటన రద్దు కావడం, లండన్ నుంచి ఆయన హైదరాబాద్కు తిరిగి రావడంపై భిన్న కథనాలు ప్రచారంలో ఉన్నాయి. కేంద్ర ప్రభుత్వ అనుమతులు లభించకపోవడంతో పర్యటనలో మార్పు జరిగిందని అధికారిక వర్గాలు చెబుతున్నప్పటికీ, కాంగ్రెస్లోని అంతర్గత పరిణామాలే దీనికి కారణమనే ప్రచారం సోషల్ మీడియాలో జోరుగా సాగుతోంది.
మరోవైపు కేబినెట్ విస్తరణపై కొనసాగుతున్న ఆలస్యం కూడా పార్టీలో అసంతృప్తికి కారణమవుతున్నట్లు తెలుస్తోంది. మంత్రి పదవులు ఆశిస్తున్న పలువురు సీనియర్లు నిరాశలో ఉన్నారనే చర్చ జరుగుతోంది. అయితే మొయినాబాద్ సమావేశం, ఎమ్మెల్యేల అసంతృప్తి, రేవంత్ విదేశీ పర్యటనపై వస్తున్న కథనాల్లో ఏది వాస్తవం, ఏది రాజకీయ ప్రచారం అనేది స్పష్టంగా తెలియాల్సి ఉంది. ఈ పరిణామాలు నిజంగా కాంగ్రెస్ ప్రభుత్వంపై ప్రభావం చూపుతాయా అనేది రాబోయే రోజుల్లో తేలనుంది.
