1980లో లెజెండరీ డైరెక్టర్ కే. బాలచందర్, కమల్ హాసన్ కాంబినేషన్లో వచ్చిన ‘ఆకలి రాజ్యం’ నాటి నిరుద్యోగుల పరిస్థితులకు అద్దం పట్టి కల్ట్ క్లాసిక్గా నిలిచింది. సరిగ్గా 45 ఏళ్ల తర్వాత, అదే నిరుద్యోగ నేపథ్యాన్ని నేటి ఐటీ విప్లవం, యూత్ లైఫ్స్టైల్కి ముడిపెడుతూ నీలగిరి మామిళ్ల దర్శకత్వంలో తెరకెక్కిన వెబ్ సిరీస్ ‘ఆకలి రాజ్యం 2026’. వికాస్ వశిష్ఠ, గీతా సైనీ, రాజేష్ ఖన్నా ప్రధాన పాత్రల్లో నటించిన ఈ సిరీస్ ఇటీవల ‘ఆహా’ (Aha) ఓటీటీలో స్ట్రీమింగ్ అవుతోంది.
కథ ఏంటంటే?
ఇంజినీరింగ్ (B.Tech) పూర్తి చేసి, ఉద్యోగాలు దొరక్క హైదరాబాద్లో ఒకే గదిలో అద్దెకుంటూ కష్టపడే ముగ్గురు స్నేహితులు రమేశ్ (వికాస్ వశిష్ఠ), అరుణ (గీతా సైనీ), అక్షయ్ (రాజేశ్ ఖన్నా) ల కథ ఇది. సొంతంగా ఏదైనా స్టార్టప్ లేదా బిజినెస్ మొదలుపెట్టాలనే కోరిక ఉన్నప్పటికీ, ఆర్థిక ఇబ్బందులు, కుటుంబ సమస్యలు వీరిని నిలవనీయవు.
ఇద్దరు అబ్బాయిలతో అరుణ ఒకే రూమ్లో ఉండటం వల్ల ఎదురయ్యే అనుమానాలు, రూమ్ ఓనర్ బిట్టు భాయ్ (రమేష్ ఈరావేన) పెట్టే రెంట్ తిప్పలు, చేసిన బిజినెస్ ప్లాన్ వర్కవుట్ కాక అప్పులపాలై వీరి మధ్య వచ్చే విభేదాలు… వీటన్నింటినీ ఈ ముగ్గురూ ఎలా దాటారనేదే ఈ సిరీస్ మూలకథ.
సిరీస్ ఎలా ఉందంటే?
నేటి తరం ఇంజినీరింగ్ గ్రాడ్యుయేట్లు ఉద్యోగ వేటలో ఎదుర్కొంటున్న సవాళ్లను, నిరుద్యోగ సమస్యనూ ప్రతిబింబించేలా ఈ సిరీస్ను మలచడం ఒక మంచి ప్రయత్నం. మొదటి రెండు ఎపిసోడ్లు సరదా కామెడీతో తేలికగా సాగిపోగా, మూడో ఎపిసోడ్ ఎమోషనల్గా ప్రేక్షకుల మనసును హత్తుకుంటుంది. హైదరాబాద్లోని రియల్ లొకేషన్స్లో షూటింగ్ చేయడం వల్ల కథ మన చుట్టూ ఉన్న మనుషుల కథలా చాలా సహజంగా అనిపించడమే కాకుండా, ప్రధాన పాత్రలైన ఆ ముగ్గురి మధ్య ఫ్రెండ్షిప్, విభేదాలు, వర్కవుట్ అయిన క్లైమాక్స్ ఎమోషన్ సిరీస్కి ప్రధాన బలంగా నిలిచాయి. అంతేకాకుండా, తర్వాతి ఎపిసోడ్లలో కథ ‘స్మార్ట్ ఫార్మింగ్’ వైపు అడుగులు వేయబోతోందనే ఆసక్తికరమైన లీడ్ ఇవ్వడం సిరీస్పై మరింత క్యూరియాసిటీని పెంచుతుంది.
అయితే, ఈ సిరీస్లో కొన్ని బలహీనతలు కూడా ఉన్నాయి. ఈ తరహా నిరుద్యోగ నేపథ్యం ఉన్న కథలు ఇప్పటికే పలు సినిమాలు, యూట్యూబ్ సిరీస్లలో చూసేయడం వల్ల కథనంలో కొత్తదనం కాస్త తగ్గినట్లు అనిపిస్తుంది. దీనికితోడు, సంపాదించే పాత్ర కంటే ఏ పని చేయని పాత్రే ఖర్చులు భరించడం లాంటి కొన్ని లాజిక్ లేని సీన్లు, అక్కడక్కడ కథ సాగదీసినట్లు అనిపించే సన్నివేశాలు ప్రేక్షకుల సహనాన్ని కాస్త పరీక్షిస్తాయి. అలాగే, కొన్ని చోట్ల వినిపించే డబుల్ మీనింగ్ డైలాగ్స్ కూడా కొంతవరకు ఇబ్బందికరంగా అనిపించవచ్చు. ఏదేమైనా, ఈ చిన్న చిన్న లోపాలను పక్కన పెడితే సమయాన్ని సరదాగా గడపడానికి ఇదొక టైమ్పాస్ ఓటీటీ సిరీస్.
ప్లస్ పాయింట్స్:
మొదటి రెండు ఎపిసోడ్లు సరదా కామెడీతో సాగితే, మూడో ఎపిసోడ్ ఎమోషనల్గా ఆకట్టుకుంటుంది.
ముగ్గురి మధ్య ఉండే ఫ్రెండ్షిప్, విభేదాలు, క్లైమాక్స్ ఎమోషన్ బాగా వర్కవుట్ అయ్యాయి.
హైదరాబాద్లోని రియల్ లొకేషన్స్లో షూట్ చేయడం వల్ల కంటెంట్ మన చుట్టూ జరిగే కథలా సహజంగా అనిపిస్తుంది.
ప్రతీ ఎపిసోడ్ 35 నిమిషాల నిడివితో సాగుతూ తర్వాతి ఎపిసోడ్లలో ‘స్మార్ట్ ఫార్మింగ్’ వైపు కథ మారేలా ఆసక్తికరమైన లీడ్ ఇచ్చారు.
మైనస్ పాయింట్స్:
ఈ తరహా నిరుద్యోగ కథలు ఇప్పటికే యూట్యూబ్ సిరీస్లలో, సినిమాల్లో చూసేయడం వల్ల కథనంలో కొత్తదనం కాస్త తగ్గినట్లు అనిపిస్తుంది.
కొన్ని లాజిక్ లేని సీన్లు, సాగదీసిన భావన కలిగించే సన్నివేశాలు ఉన్నాయి.
కొన్ని చోట్ల వినిపించే డబుల్ మీనింగ్ డైలాగ్స్ కొంతవరకు ఇబ్బంది పెట్టవచ్చు.
నటీనటులు & సాంకేతిక విభాగం:
వికాస్ వశిష్ఠ, గీతా సైనీ, రాజేశ్ ఖన్నా ప్రధాన పాత్రల్లో చక్కగా ఒదిగిపోయారు. తమ పాత్రల్లోని కాన్ఫ్లిక్స్, ఎమోషన్స్ను సమర్థవంతంగా పండించారు. రూమ్ ఓనర్గా బిట్టు భాయ్ పాత్ర కూడా నవ్విస్తుంది.
సాంకేతికంగా హరిచరణ్ సినిమాటోగ్రఫీ, విజువల్స్ బాగున్నాయి. వంశీకాంత్ రేఖనా బ్యాక్గ్రౌండ్ మ్యూజిక్ కథకు తగ్గట్లుగా సాగుతుంది. తక్కువ బడ్జెట్లో నిర్మించినప్పటికీ నిర్మాణ విలువలు పర్వాలేదనిపిస్తాయి.
తీర్పు:
వీకెండ్లో సరదాగా, టైమ్పాస్ కోసం చూడటానికి ‘ఆకలి రాజ్యం 2026’ ఒక మంచి ఓటీటీ ఆప్షన్.
