తెలంగాణ సీఎం రేవంత్ రెడ్డి భద్రాచలం రాముడి మీద ఆన చేస్తూ కాంగ్రెస్ కు 117 సీట్లు వస్తాయని ప్రకటించారు. ఆయన మాట్లాడుతూ వచ్చే ఎన్నికల్లో తమ పార్టీ మళ్లీ అధికారంలోకి వస్తుందని ధీమాగా చెప్పారు. ప్రస్తుతం రాష్ట్రంలో 119 అసెంబ్లీ సీట్లు ఉండగా, వాటిని 182కి పెంచే బిల్లు పార్లమెంట్లో పాస్ అవుతుందని ఆయన అంచనా వేశారు. ఈ లెక్కన తాము ఖచ్చితంగా 117 స్థానాల్లో గెలుస్తామని రేవంత్ రెడ్డి స్పష్టం చేశారు.
ఖమ్మం జిల్లా జగన్నాథపురంలో రైతు భరోసా చివరి విడత నిధుల పంపిణీ కార్యక్రమంలో సీఎం మాట్లాడారు. ఈ సందర్భంగా ఆయన తమ ప్రభుత్వం అన్ని వర్గాలకు మేలు చేస్తోందని చెప్పారు. గత పాలకులు విస్మరించిన వర్గాలను కూడా తాము చేరదీస్తున్నామని వివరించారు. ఇప్పటివరకు 80 వేలకు పైగా ఉద్యోగాలు ఇచ్చామని, మరిన్ని ఉద్యోగాలు కల్పించడానికి సిద్ధంగా ఉన్నామని ఆయన తెలిపారు.
ఎన్నికలు 2028 డిసెంబర్లో కాకుండా 2029 మేలో జరుగుతాయని సీఎం వెల్లడించారు. సీట్ల పెంపు తర్వాతే ఎన్నికలు నిర్వహిస్తామని, షెడ్యూల్ ప్రకారమే ఎన్నికలు జరుగుతాయని చెప్పారు. లోక్సభ స్థానాలు 17 నుంచి 26 వరకు పెరిగితే, వాటిలో రమారమి 20 స్థానాల్లో విజయం సాధిస్తామని ఆయన ఆశాభావం వ్యక్తం చేశారు. ఏ పార్టీతోనూ తమకు పంచాయతీ లేదని, ప్రజలతోనే కలిసి విజయం సాధిస్తామని రేవంత్ రెడ్డి పేర్కొన్నారు.
గత పాలకులు రాష్ట్రాన్ని అప్పుల మయం చేశారని, అందుకే ఖజానా ఇబ్బంది పడుతోందని సీఎం విమర్శించారు. భద్రాచలం రాముడి మీద ఆన చేస్తూ కాంగ్రెస్ కు 117 సీట్లు గెలుచుకొని మళ్లీ ప్రజా ప్రభుత్వాన్ని తీసుకొస్తామని ఆయన భారీ ప్రకటన చేశారు. ఈ హామీని నిజం చేయడానికి తాము కట్టుబడి ఉన్నామని, ప్రజల ఆశీర్వాదం మాత్రమే తమకు కావాలని రేవంత్ రెడ్డి చెప్పారు.
