భారత్ వేదికగా జరిగిన టీ20 ప్రపంచ కప్ 2026 (World Cup) క్రికెట్ చరిత్రలో ఒక అద్భుత ఘట్టంగా నిలిచిపోయింది. ఫిబ్రవరి 7 నుండి మార్చి 8 మధ్య జరిగిన ఈ మెగా టోర్నీలో, సూర్యకుమార్ యాదవ్ (Suryakumar Yadav) నేతృత్వంలోని టీమ్ ఇండియా ఫైనల్లో న్యూజిలాండ్ను చిత్తు చేసి విశ్వవిజేతగా నిలిచింది. అయితే, ఈ విజయోత్సాహం ఇంకా తగ్గకముందే టోర్నీలో ఫిక్సింగ్ జరిగిందనే ఆరోపణలు రావడం క్రీడాభిమానులను దిగ్భ్రాంతికి గురిచేస్తోంది. టోర్నీలో కొన్ని మ్యాచ్లలో అక్రమాలు జరిగినట్లు వార్తలు రావడంతో అంతర్జాతీయ క్రికెట్ మండలి (ICC) విచారణకు ఆదేశించింది.
ముఖ్యంగా గ్రూప్-డి లో భాగంగా చెన్నై వేదికగా జరిగిన న్యూజిలాండ్ మరియు కెనడా మ్యాచ్ (Match) పై ఐసీసీ ప్రధానంగా దృష్టి సారించింది. ఈ పోరులో కెనడా బ్యాటర్ యువరాజ్ సమ్ర అద్భుతమైన సెంచరీతో రాణించడంతో ఆ జట్టు 173 పరుగుల భారీ స్కోరు సాధించింది. లక్ష్య ఛేదనలో కివీస్ ఓపెనర్లు త్వరగా అవుట్ కావడంతో కెనడా చారిత్రాత్మక విజయం సాధిస్తుందని అందరూ భావించారు. కానీ, ఆ తర్వాత జరిగిన కొన్ని అసాధారణ పరిణామాలు తీవ్ర అనుమానాలకు తావిచ్చాయి. దీంతో ఐసీసీ (ICC) అవినీతి నిరోధక విభాగం రంగంలోకి దిగింది.
ఈ వివాదంలో కెనడా కెప్టెన్ దిల్ప్రీత్ బజ్వా తీసుకున్న నిర్ణయాలు అనుమానాస్పదంగా ఉన్నాయి. అతను క్రమం తప్పకుండా బౌలింగ్ చేసే ప్లేయర్ కాకపోయినప్పటికీ, అత్యంత కీలకమైన పవర్ ప్లే (Powerplay) లో స్వయంగా బౌలింగ్ చేసి భారీగా పరుగులు సమర్పించుకున్నాడు. కేవలం రెండు ఓవర్లలోనే 26 పరుగులు ఇచ్చి వికెట్ తీయడంలో విఫలమయ్యాడు. అలాగే బ్యాటింగ్లో కూడా లక్ష్యం దిశగా వెళ్లకుండా, కేవలం 36 పరుగులు చేయడానికి 39 బంతులు తీసుకోవడం ఫిక్సింగ్ (Fixing) ఆరోపణలకు బలాన్ని చేకూర్చింది. గెలిచే స్థితిలో ఉండి కూడా కెనడా ఓటమి పాలవడం వెనుక ఏదైనా ‘బుకీల’ హస్తం ఉందా అనే కోణంలో దర్యాప్తు జరుగుతోంది.
కెనడాకు చెందిన ‘ది ఫిఫ్త్ స్టేట్’ అనే ఇన్వెస్టిగేటివ్ డాక్యుమెంటరీ (Documentary) ప్రసారం చేసిన కథనం ఈ దుమారాన్ని మరింత పెంచింది. ఈ టోర్నమెంట్ (Tournament) ప్రారంభానికి కొన్ని వారాల ముందే దిల్ప్రీత్కు కెప్టెన్సీ (Captaincy) బాధ్యతలు అప్పగించడం కూడా ఇప్పుడు చర్చనీయాంశమైంది. ప్రస్తుతం ఐసీసీ అవినీతి నిరోధక విభాగం (ACU) ఈ వ్యవహారాన్ని అత్యంత ప్రతిష్టాత్మకంగా తీసుకుంది. క్రికెట్ క్రీడ యొక్క పారదర్శకతను కాపాడేందుకు, ఈ కుట్రలో ఎవరి ప్రమేయం ఉన్నా కఠిన చర్యలు తీసుకునే అవకాశం ఉంది.
