శ్రీనగర్: జమ్ముకశ్మీర్లోని షోపియాన్ జిల్లాలో పండ్ల తోటలో దాగి ఉన్న ఇద్దరు ఉగ్రవాదులను భద్రతా దళాలు ఎన్కౌంటర్ చేశాయి. ఈ ఎన్కౌంటర్లో లష్కర్-ఎ-తైబా ఉగ్రవాద సంస్థకు చెందిన ఇద్దరు సభ్యులు హతమైనట్లు అధికార వర్గాలు ధ్రువీకరించాయి. దక్షిణ కాశ్మీర్లోని మీమందర్ ప్రాంతంలో శుక్రవారం సీసీటీవీ ఫుటేజ్ ద్వారా వారి ఉనికిని గుర్తించిన సైన్యం వెంటనే సెర్చ్ ఆపరేషన్ ప్రారంభించింది.
షోపియాన్ జిల్లా మీమందర్ ప్రాంతంలోని పండ్ల తోటలో లష్కర్-ఎ-తైబా ఉగ్రవాదులు నక్కిన సమాచారంతో భద్రతా దళాలు అప్రమత్తమయ్యాయి. ఈ ఇద్దరు ఉగ్రవాదులను జాకీర్, లతీఫ్గా గుర్తించారు. జాకీర్ 2024 నుంచి నిషేధిత ఎల్ఈటీతో సంబంధాలు కలిగి ఉండగా, లతీఫ్ గత ఏడాది ఈ సంస్థలో చేరినట్లు విచారణలో తేలింది. సైన్యం, జమ్ముకశ్మీర్ పోలీసులు, సెంట్రల్ రిజర్వ్ పోలీస్ ఫోర్స్ సంయుక్తంగా ఈ ఆపరేషన్ను నిర్వహించాయి.
శనివారం సైన్యం ఉగ్రవాదులను సమీపించే క్రమంలో వారు కాల్పులు జరిపారు. దీనికి ప్రతిగా భద్రతా దళాలు ఎదురుకాల్పులు చేపట్టడంతో ఎన్కౌంటర్ మొదలైంది. ఆదివారం కూడా సెర్చ్ ఆపరేషన్ కొనసాగింది. ఉగ్రవాదులు తప్పించుకునే అవకాశం లేకుండా నాలుగు గ్రామాలను క్లియర్ చేసి, చుట్టుపక్కల ప్రాంతంలో కట్టుదిట్టమైన భద్రతా వలయాన్ని ఏర్పాటు చేశారు. అదనపు బలగాలను కూడా రప్పించి తనిఖీలు ముమ్మరం చేశారు.
ఈ ఎన్కౌంటర్లో ఇద్దరు ఉగ్రవాదులు హతమైనట్లు తొలి సమాచారం అందినప్పటికీ, వారి మృతదేహాల కోసం ఇంకా గాలింపు చర్యలు కొనసాగుతున్నట్లు ఆర్మీ అధికారులు తెలిపారు. లష్కర్-ఎ-తైబా ఉగ్రవాద సంస్థకు సంబంధించిన ఈ సంఘటన ప్రాంతంలో ఉగ్రవాద కార్యకలాపాలపై భద్రతా దళాల అప్రమత్తతను మరోసారి తెలియజేస్తుంది. సెర్చ్ ఆపరేషన్ పూర్తయ్యే వరకు ప్రాంతంలో భద్రతను మరింత కట్టుదిట్టం చేశారు.
