హైదరాబాద్లో పోలీస్ బ్రూటాలిటీ, సివిల్ సెటిల్మెంట్లు, పోక్సో కేసుల నిర్లక్ష్యం కారణంగా శాంతిభద్రతలు అదుపుతప్పుతున్నాయి. పోలీసింగ్ పట్టు తప్పడంతో దుండగులు పెట్రేగిపోతుండగా, ప్రజలు రక్షణ కోసం పోలీస్ స్టేషన్లకు వెళ్ళాలంటేనే భయపడుతున్నారు. రోజురోజుకూ క్రైమ్ రేట్ పెరుగుతున్నా, అధికారులు వ్యక్తిగత లాభాల కోసం సివిల్ వివాదాల్లో తలదూర్చి కోట్ల సెటిల్మెంట్లు చేస్తున్నారనే ఆరోపణలు వెల్లువెత్తుతున్నాయి.
పోక్సో కేసుల విషయంలో పోలీసుశాఖ పూర్తి నిర్లక్ష్యంగా వ్యవహరిస్తోంది. నిర్భయ, పోక్సో చట్టాలను సరిగ్గా అమలు చేయకపోవడంతో నిందితులు లీగల్ లూప్ హోల్స్ ద్వారా సులువుగా బెయిల్ పొందుతున్నారు. షాబాద్ పోక్సో కేసులో పోలీసుల అజాగ్రత్త వల్లే ఆరుగురి ప్రాణాలు పోయాయని స్థానికులు ఆగ్రహం వ్యక్తం చేస్తున్నారు. తాజాగా కేంద్ర సహాయ మంత్రి బండి సంజయ్ కుమారుడు బండి భగీరథ్కు హైకోర్టు సాధారణ బెయిల్ ఇవ్వడంపై భిన్నాభిప్రాయాలు వెలువడుతున్నాయి.
కొత్త డీజీపీ సీవీ ఆనంద్ ప్రతినెలా క్రైమ్ రివ్యూలు నిర్వహించాలని ఆదేశించినా, వాటిని పట్టించుకోవడం లేదు. అవినీతి కేసుల్లో పంచాయతీరాజ్ శాఖ తర్వాత మూడోస్థానంలో పోలీసుశాఖ నిలిచింది. హోం శాఖ సీఎం చూస్తున్నా ఇలాంటి సంఘటనలు తరచూ జరుగుతుండటం ఆందోళనకరం. 2024లో 152 మంది అధికారులు అరెస్ట్ కాగా, 2025లో ఈ సంఖ్య 199కి పెరిగింది.
పోలీస్ సిబ్బందిలో బాధ్యత, జవాబుదారీతనం కొరవడితే మాత్రం శాంతిభద్రతల పరిస్థితి మరింత దిగజారే ప్రమాదం ఉంది. సివిల్ సెటిల్మెంట్లు, పోక్సో కేసుల నిర్లక్ష్యం, క్రైమ్ రివ్యూలు లేకపోవడం వంటి సమస్యలపై పోలీసుశాఖ వెంటనే చర్యలు తీసుకోకపోతే, ప్రజల్లో నమ్మకం పూర్తిగా కోల్పోయే అవకాశం ఉంది.
