మెగ్నీషియం సప్లిమెంట్స్ ఇటీవల సోషల్ మీడియాలో ట్రెండ్ అవుతున్నాయి, కానీ ఇవి నిజంగా అవసరమా లేదా అనేది పెద్ద ప్రశ్న. నిపుణుల హెచ్చరిక ప్రకారం, వైద్య సలహా లేకుండా ఈ సప్లిమెంట్లను తీసుకోవడం వల్ల గుండె సమస్యల వంటి తీవ్రమైన సమస్యలు వచ్చే ప్రమాదం ఉంది. ఇటీవల ఓ మహిళ మెగ్నీషియం సప్లిమెంట్స్ ఎక్కువగా తీసుకుని గుండె స్పందన తీవ్రంగా అస్తవ్యస్తం అయి ఎమర్జెన్సీ రూమ్కు వెళ్లిన కేసు వైరల్ అయింది. కాబట్టి, ఎలాంటి సప్లిమెంట్ అయినా డాక్టర్ సూచనపై మాత్రమే తీసుకోవాలి.
మెగ్నీషియం గుండె ఆరోగ్యానికి చాలా ముఖ్యమైనది, కానీ మితిమీరిన మోతాదు హానికరం. ISIC మల్టీస్పెషాలిటీ హాస్పిటల్ కార్డియాక్ సైన్సెస్ డైరెక్టర్ డాక్టర్ అసీమ్ ధాల్ మాట్లాడుతూ, చాలా ఎక్కువ మెగ్నీషియం గుండె యొక్క ఎలక్ట్రికల్ సిస్టమ్ను దెబ్బతీస్తుంది అని అన్నారు. దీని వల్ల నెమ్మదిగా పల్స్, మైకము, లేదా కొన్ని తీవ్రమైన సందర్భాల్లో కార్డియాక్ అరెస్ట్ కూడా వచ్చే ప్రమాదం ఉంది. మూత్రపిండాల సమస్యలు ఉన్నవారిలో ఈ రిస్క్ మరింత ఎక్కువ.
మెగ్నీషియం ఓవర్డోజ్ యొక్క ప్రారంభ లక్షణాలు సాధారణంగా జీర్ణ సమస్యలతో మొదలవుతాయి. తరచుగా విరేచనాలు, వికారం, కడుపులో అసౌకర్యం మరియు వాంతులు శరీరంలో ఎక్కువ మెగ్నీషియం ఉందని సూచిస్తాయి. అలాగే, విపరీతమైన అలసట, కండరాల బలహీనత, తలతిరగడం వంటివి కూడా కనిపించవచ్చు. అయితే, ఈ లక్షణాలు ఇతర కారణాల వల్ల కూడా రావొచ్చు, కాబట్టి వెంటనే డాక్టర్ను కలవడం బెటర్.
చివరగా, సహజమైనది అని భావించి ఎలాంటి సప్లిమెంట్ ను అయినా నిర్లక్ష్యంగా తీసుకోకూడదు. సోషల్ మీడియా ట్రెండ్స్ కన్నా మీ శరీర అవసరాలకు ప్రాధాన్యత ఇవ్వండి. మెగ్నీషియం సప్లిమెంట్స్ తీసుకునే ముందు ఒక సింపుల్ ప్రశ్న వేసుకోండి: నాకు ఇది నిజంగా అవసరమా? అని. డాక్టర్ సలహా లేకుండా ఎలాంటి సప్లిమెంట్ ను మీ రొటీన్లో చేర్చకండి.
