Rahul Gandhi:భారత్-అమెరికా మధ్య కుదిరిన వాణిజ్య ఒప్పందంపై (Trade Deal) లోక్సభ ప్రతిపక్ష నేత రాహుల్ గాంధీ తీవ్ర స్థాయిలో విమర్శలు గుప్పించారు. ఈ ఒప్పందం భారత రైతులకు చేస్తున్న ద్రోహమని ఆరోపిస్తూ, ప్రధాని నరేంద్ర మోదీకి ఐదు కీలక ప్రశ్నలను సంధించారు. ‘ఎక్స్’ (X) వేదికగా స్పందించిన రాహుల్, ఈ డీల్ వల్ల రైతులకు కలిగే నష్టంపై ప్రభుత్వం తక్షణమే స్పష్టత ఇవ్వాలని డిమాండ్ చేశారు. ఇది కేవలం ప్రస్తుత సమస్య మాత్రమే కాదని, దేశ వ్యవసాయ రంగం భవిష్యత్తుకు సంబంధించిన కీలక విషయమని ఆయన అభిప్రాయపడ్డారు.
Rahul Gandhi Five Questions To PM
అమెరికా నుండి దిగుమతి చేసుకునే Dried Distillers Grains (DDG) గురించి రాహుల్ ప్రధానంగా ప్రశ్నించారు. జన్యు మార్పిడి (Genetically Modified) చేసిన మొక్కజొన్నను పశుగ్రాసంగా వాడటం వల్ల మన పాడి పరిశ్రమ అమెరికాపై ఆధారపడే ప్రమాదం ఉందా అని ఆయన ఆందోళన వ్యక్తం చేశారు. ఈ విధానం వల్ల భారతీయ పశువులకు ఇచ్చే మేత కోసం విదేశీ కంపెనీలపై ఆధారపడాల్సి వస్తుందని, ఇది దేశీయ డైరీ ఇండస్ట్రీపై (Dairy Industry) తీవ్ర ప్రభావం చూపుతుందని హెచ్చరించారు.
ముఖ్యంగా సోయాబీన్ సాగు చేసే రైతుల పరిస్థితిపై రాహుల్ ఆందోళన వ్యక్తం చేశారు. అమెరికా నుండి వచ్చే జన్యు మార్పిడి సోయాబీన్ ఆయిల్ (Soybean Oil) దిగుమతుల వల్ల మధ్యప్రదేశ్, మహారాష్ట్ర, రాజస్థాన్ వంటి రాష్ట్రాల్లోని రైతుల జీవనోపాధి దెబ్బతినదా అని ప్రశ్నించారు. ఈ ఒప్పందంలో చేర్చిన అదనపు ఉత్పత్తులు (Additional Products) ఏమిటో బహిర్గతం చేయాలని కోరారు. భవిష్యత్తులో పప్పు ధాన్యాలు మరియు ఇతర అమెరికన్ పంటల దిగుమతులకు ఈ ఒప్పందం ద్వారా ద్వారాలు తెరుస్తున్నారా అని ఆయన నిలదీశారు.
వాణిజ్యేతర అడ్డంకులు (Non-tariff barriers) తొలగించడం ద్వారా భారత రైతులకు ఇచ్చే కనీస మద్దతు ధర (Minimum Support Price – MSP) లేదా బోనస్లను తగ్గించే ఒత్తిడి పెరుగుతుందా అని రాహుల్ అనుమానం వ్యక్తం చేశారు. భవిష్యత్తులో జన్యు మార్పిడి పంటలపై (GM Crops) భారత్ తన పట్టు కోల్పోయే అవకాశం ఉందా అని ప్రశ్నించారు. భారత వ్యవసాయ రంగంపై మరో దేశం ఆధిపత్యాన్ని చెలాయించేలా ఈ ఒప్పందం ఉందన్న అనుమానాలను ప్రభుత్వం నివృత్తి చేయాలని రాహుల్ గాంధీ కోరారు.